Pachhunga University College-in a vawikhatna atana Library Week an buatsaih chu vawiin khan Mizoram University Registrar, Pu C. Zothankhuma chuan a hawng.

Library Week hawnna inkhawm hi an College Library-ah hman niin, Vice Principal, Dr. Lalbiaksangi Chawngthu chuan inkhawm a kaihruai a, Principal Dr. Tawnenga chuan library week hman chhan a sawi a, Dr. Lalthanmawii Sailo, Librarian chuan Library chungchang report a pe bawk. 

Library Week hawngtu Pu C.Zothankhuma chuan, library chu zirna in tana rohlu pawimawh tak a nih thu sawiin, 'Library hmangtu an pung tual tual te, library building leh hmanraw tha tulh tulh te hi hman tangkai zel a tul a ni,' a ti.

Library week-ah hian Mizoram chhung leh pawna lehkhabu dawr hrang hrang ten 'Book Fair' buatsaihin, zirlaite tan discount tha tak an pe a. Hei bakah hian Mizoram chhunga thil hlu leh lehkhabu pawimawh hrang hrang phochhuahna (display of rare collections) an buatsaih bawk.

Week chhung hian College zirlaite tan painting competition, book mark and badge design competition, essay writing competition leh ziakmite kawmna (meet the author) buatsaih a ni dawn bawk.

Pachhunga University College hi 1958-a din niin 1960 atang khan library an nei tan a, tunah hian lehkhabu 52,054 a awm mek. Kum 2015-16 chhung khan lehkhabu thar 917, Rs. 5,42,795 man an lei a, journal 27 leh Magazine 14 an subscribe mek bawk.

PUC library-ah hian wifi dah a ni a, fire alarm leh fire fighting system dah niin rualbanlote kalna bik 'ramp' pawh siam thlap a ni a. Redio Frequency identification (RFID) nei tur te, Internet Resource Centre (IRC) te, Web OPAC hmanga campus network nei tur tein hma lak mek a ni a, reilote-ah hawn theih beisei a ni hlawm bawk.

kldl