Nimin tlai khan Aizawl Sipai Lammualah Mizoram chhunga kawngpui Km 3600 zet siamtu, Project Pushpak chuan kum 50 a tlin champha a lawm. He hun hi Chief Minister Pu Lal Thanhawla leh Mizoram sawrkar mi pawimawh te, Assam Riffles leh an chhungkuate, Border Security Force(BSF)  leh an chhungkuate bakah khuawtual mi ten an hmanpui a. Project Pushpak hi Mizo mipui tam zawkin kawngsiamtute, 'Painar(Pioneer)' tia an hriatlar kha an ni.

Mizoram a Project Pushpak hnathawh hunchhung in kum 50 a  tlin lawmnaah Chief Minister Pu Lal Thanhawla chuan lawmpuina thu a sawi a. Mizoram tana hna ropui tak thawktu Border Roads Organization(BRO) hmalakna Project Pushpak hnathawkte chungah thinlung takin Mizo mipuite an lawm tih sawiin Mizoram hmasawnna atan Pushpak hnathawh chu thil langsar ber pawl a ni reng tawh ang a ti. Chief Minister chuan  Mizoram buai chhoh tan tak tak lai, kum 1967 May thlaah Project Pushpak chu Mizoramah an rawn inbun nghet tih sawiin an hnathawhna kawngah harsatna namenlo an tawh thu a sawi a. Chuti chung pawha beidawng lova an thawh avangin Mizoram chhimtawp leh hmartawp inkar atanga ramri dep, khawthlang hmawr leh khawchhak kil thlenga kawng an siam avanga tun dinhmin Mizoram in thleng thei a ni a ti. Kawng vangin Myanmar leh Bangladesh-a Mizo te leh Mizoram chhunga mizo te pawh inpawh zawkin an awm phah mai bakah Mizoram in kawng tin rengah hma a sawn phah a ni a ti a. Painar te leh Mizo mipuite thawhhonna a that thu leh mizo mipui ten an ngainat thu a sawi a; rambuai chhung khan Project Pushpak avangin Mizo mipuite tan kawngsiamnaah hnathawh tur a awm phah a;  Painar-ho chu  sumhnar an nih piah lamah eizawnna pe tu an ni tel a ni a ti a. Painar te hnathawh that leh an thil tih ropui tak te zawng zawng chu Mizo mipui ten an hre reng tawh dawn a ni a ti.

BRO in Mizoram chhunga hna an thawh hmasa ber ni turin 1963  kuma Mizoram a kawng awm chhung Silchar leh Aizawl inkar Jeep Road siam tha turin Project Sewak, Nagaland hnuaia 17 BRTF te chu tirh an ni a. Anni hian Silchar leh Aizawl inkar kawngsiam that bakah Aizawl leh Lunglei inkar kawngzawn hna chu an thawk a. Lunglei leh aizawl kawng zawn pawh harsa takin kum 1963 vek hian an thawk zo a ni. Aizawl leh Lunglei inkar kawng siam hna chak zawka thawk turin 8 BRTF leh 18 BRTF te chu Mizoramah 1965 kum khan an rawn lut ve leh a; Mahse 1966 kumah Mizoram a buai tak avangin kawngsiam zawh hun tur 1967-ah kawng siam zawh hman a ni ta lo a ni. An harsatna avanga kawng siam chawlhsan mai lovin, tumruhna thar nen BRO chuan Mizoram a kawngsiam hna chu nasa zawka thawk turin Col SS Chhachhi hotu atan rawn ruatin Project Pushpak chu 1967 May ni 1 ah khan a din a, Mizoram a BRTF Task Force 3 lo awmsa chu a enkawl chho ta a ni. An hnathawh that avangin Mizoram chu Headquarterah hmangin Meghalaya, Assam leh Tripura state chhunga kawng tam tak siam hna thawh tir an ni.  Project Pushpak chu 1980 leh 1990 chho velah khan BRO hnuai Project lianber an ni a, BRTF Task Force 5 - 23 BRTF, 24 BRTF, 36 BRTF, 42 BRTF leh 755 BRTF  te chu Project Pushpak hnuaia hnathawktute niin an hmunpuiber Mizoram bakah  Meghalaya, Tripura leh Assam chhunga ramri kawngte an enkawl a. Tun thlengin Chief Engineer 21  awm tawhin an hnathawh that avangin chawimawina tam tak an dawng tawh a; chawimawina an dawntawh zingah Kirti Chakra 4, Padma Shree 1 leh Shaurya Chakra 23 te pawh a tel a. Tunah hian Project Pushpak hnuaiah BRTF 3 - 24 BRTF, Seling, 765 BRTF(UPP), Uchasthal, Barak - Jiribam Road, Manipur leh 46(I) Task Force, Port Blair, Andamans and Nicobar Islands te awm mekin Chief Engineer ni mek chu Brig Birender Singh a ni a. Project Pushpak hian a din tirh atangin  kawngpui(all weather road) Km 3600 a thui leh Lei(bridge) Metre 2200 a sei an siam tawh a ni.