2297/2026-2027

Dated Aizawl, 22nd September 2026: Vawiin khan Engineer-in-Chief Conference Hall, Public Works Department-ah Finance Department bultumin PWD hnuaia Engineer leh Officer hrang hrang te tan Mizoram Integrated Works and Accounts Management System (MIWAS) application hman chhinna leh a that dan enchhinna (User Acceptance Testing) neih a ni.

He hunah hian PWD Jt. Director (Finance & Accounts) Pu C. Lungmuanpuia'n inlawmna leh inhmelhriattirna thu a sawi a, Dy. Secretary Pu Laldinpuia chuan thu sawiin he application hman thar tur hian department tam tak tan hna a siam awlsamin a tichak dawn tih a sawi a, he hun hi a hmangtu tur te tana enchhinna a nih vangin zawhna awm thei te zawt kima ngaihdan te sawi theuh turin kalkhawmte a sawm a ni.

He hunah hian Finance Department (FMW) Finance & Accounts Officer Pi Esther Lalremruati, Interlace India Pvt. Ltd. Project Manager Pu Mikha Mochahary, C-DAC Scientist Pu Ranjan Yengkhom leh C-DAC Project Manager Pu Saurabh Tripathi te'n enchhinna an nei a, kalkhawmte hnenah MIWAS application an siam dan leh hman dan tur te an hrilhfiah a, parameter thlak tur leh dah belh tur te an sawiho nghal bawk.

MIWAS-ah hian department hrang hrang hnathawh (works) awlsam takin a enkawl theih dawn a, department azirin parameter hrang hrang te, sum mamawh zat te, approval te leh thil dang online-in a tih vek theih tawh dawn a ni.

DPR siam atanga beneficiary a payment pek thleng system hmangin a automate tawh dawn a, MIWAS leh Integrated Financial Management Information System (IFMIS) hi thlunzawm an ni dawn a ni. Works department paruk (6) - Public Works Department (PWD), Public Health Engineering Department (PHE), Power & Electricity (P&, Land Resources, Soil & Water Conservation (LRS&WC), Irrigation & Water Resources Department (IWRD), Environment, Forest & Climate Change (EFCC) te'n bill siam nan an hmang ang. He testing zawh hian a taka kalpui vat a ni ang.