2298/2026-2027

Vawiin khan Social Welfare Secretary Pi Lalzarmawii, IAS kaihhruaiin Department hotute leh Central YMA hruaitute chuan Mizoram pum huapa Central YMA ten Ruihhlo Dona atana inzirtirna - Awareness & Capacity Building under National Action Plan for Drugs Demand Reduction Scheme under Ministry of Social Justice & Empowerment, Govt of India (MOSJE), an kalpui tur chungchangah inkawmhona an nei.

Ruihhlo that lohzia inzirtirna kalpui dan tur sawi honaah hian Social Welfare Secretary Pi Lalzarmawii chuan Ministry of Social Justice & Empowerment atanga kan ram leh hnam mamawh em em - ruihhlo chungchang inzirtirna atana hman tur sum thahnem tham tak Central YMA ten an dawng mai tur chu lawmawm a tih thu a sawi a. Tangkai tak leh awmze nei taka hmang turin Central YMA hruaitute chu a chah a ni. Sawrkar laipuiin zawm tura a tihte tha taka zawm chunga tangkai taka an hman Central hian a tanpui chhunzawm zel a beisei thu a sawi bawk.

He inkawm honaah hian Social Welfare Director Pu Vivek Kumar Tripathi, IAS pawhin Central YMA te beihpuithlak turah kawng engkima puihbawm an huam thu leh mamawhna an neih apiangah Central YMA hruaitute chu an puih zel tur thu a sawi ve bawk a ni.

Central YMA hruaitute chuan Ministry of Social justice & empowerment leh Mizoram Sawrkar hnuaia Social Welfare Department te chungah YMA Kumpuan - Ruihhlo Do kawnga hmalakna tur sum an dawng mai tur chu an lawmzia thu an sawi a. Daihzai tak leh tangkai taka hman ngei an tum thu an sawi a ni.

MoSJE atang hian Awareness atana CYMA sum hmuh tur hi first instalment sanction fel tawh niin CYMA Account ah release mai tura peihfel a ni tawh a. Inzirtirna kalpui tur atan hian Master Trainer te inruatin Standardised traning module siam a ni ang a, Mizoram khaw 700 chuang tuam chhuah tura ruahman a ni. State Level, District Level leh Village Level ah hmalak a ni ang.

He meeting-ah hian Social Welfare Department hotute  bakah Central YMA atangin Treasurer Er H Duhkima, Asst Secretary Pu SF David Ngursangzuala leh Finance Secretary Pu MS Ralte te an tel a ni.