Nimin khan Kaladan Multi Modal Transit Transport Project (KMMTTP) kawng laih hna thawh mek chu PWD Chief Engineer (Highways) Er K.Lalsawmvela'n a en fiah. 

Er K.Lalsawmvela hi Lawngtlaia PWD hotute leh contractor-te'n lo dawngsawngin, KMMTTP kawng laih mek chu a intanna Lawngtlai AOC Veng atangin a tawpna tur Myanmar ramri thleng an enpui a. Hna thawh mek dan leh la thawh zel dan tur te an lo hrilhfiah a ni. 

CE (Highways) hian kawng laih hna thawk mektu (contractor)-te ko khawmin, hna chu chak zawka thawk tur leh hun tiam chhung ngeia zawh hman tum turin a chah a. Kawng siam hna chu furpuia thawh chi a nih loh avangin thal lai chuan inthlahdah hauh lova thawh tur a ni, a ti. Ni tina an hna thawh dan tur ruahmanna fel tak siam a, chumi chu tihhlawhtlin zat zat tum turin hna thawktute chu a chah a. Hna thawktute'n harsatna an tawh thin hrang hrang an sawite pawh chinfel dan tur a sawipui bawk. 

KMMTTP kawng laih mek hi km 89-a thui niin, km 4 vel laih ngai a la awm a. He'ng zinga hmun thenkhat chu zangnadawmna chungchanga buaina awm vanga laih theih rih loh te an ni. Laih tawh chin tam tak chu a nih dan tur taka peihfel tawh (luan zawh tawh) niin, hmun thenkhatah chuan kawng luan hna thawh mek a ni. 

Kawng laih hna hi Contractor pahnih - RDS Project Ltd leh ARSS Infrastructure Projects Ltd te'n an thawk a. Tun thleng hian hna zawng zawng zaa 64 (64%) vel chu thawh zawh tawh niin, kum 2018 December-ah chuan kawng laih leh luan hna chu zawh hman beisei a ni a. Lui kawr lian zual pariat (8)-a lei dawh tur erawh chu zawh hun tur hriat theih a la ni lo. 

KMMTTP kawng laih hna en fiah tura kal CE (Highways) hi PWD lam atangin Multi Modal Project Circle SE Er J.Sangkhuma Khiangte, MMPD-I EE Er Lalrinngheta, MMPD-II EE Er C.Lalhumhima leh SDO leh JE te bakah, RDS leh ARSS hotute leh thawktu te, AMC Councillor hlui Pi Hmingthanzami leh media mite'n an tawiawm a ni.