2177/2026-2027

Aizawl, dated 11th September 2026: Vawiin chawhma khan Public Works Department hnuaia Executive Engineer, Assistant Engineer leh Sub Divisional Officer te tan Conference Hall, Engineer-in-Chief's Office-ah Natural Calamities Monitoring & Disaster Management System (NCIS/Calamity App) chungchang training buatsaih a ni.

He hunah hian khuhhawn nan Superintending Engineer (Planning) Er. Samuel Ramdinthara chuan thu sawiin, thiamna sang zelah chhiatna hrang hrang rang zawk leh tha zawka buaipui dan leh siamthat dan a awm tawh a, he app hi PWD hnuaia engineer leh hnathawk hrang hrang te tan malsawmna a nih ngei a beisei thu a sawi.

He training hi IT Cell atangin Technical Expert Pu Lalthanpuia'n a kaihruai a, Calamity app hman dan leh engineer te tana leimin emaw kawng chhia report dan te a zirtir. He hun hi a hmunah Aizawla PWD division leh sub-division hrang hrang hnuaia engineer te an kalkhawm bakah district hrang hrang atangin video conferencing hmangin an tel bawk a ni.

Hun khar nan Executive Engineer (IT) Er. Malsawmtluanga chuan lawmthu sawiin tangkai taka hmang turin kalkhawm te a chah a ni.

Natural Calamities Monitoring and Disaster Management System (NCIS) hi mobile based application niin Mizoram Road Asset Management System (MizoRAMS) component pakhat zing ami a ni a. He mobile app hmang hian PWD Engineer ten lei min leh kawng chhia te a hmun atangin thlalak, geo-location leh estimate nen thlap an mobile hmangin an report thei dawn a ni.

MizoRAMs system tharah hian Survey Data te chu AI model hian lo zir chiangin, IRC:82 inkaihhruaina milin standardized Pavement Condition Index (PCI) a lo siam chhuak zung zung thei dawn a. Hei hian PWD engineer te chu rang taka ruahmanna siam turin a pui thei dawn a ni.