2178/2026-2027

11th September, 2026: Mizoram Legislative Assembly-a Committee peng pawimawh - Subject Committee II te chuan an Chairman Lt. Col. Clement Lalhmingthanga, MLA hoin Pu H. Ginzalala, Dr.R. Lalthangliana, Dr. K. Beichhua, Pu R. Rohmingliana leh Pu Lalramliana ten India ram khawpui hrang hranga Mizoram House dinhmun zirchiang turin an zin.

September ni 7 atanga September ni 12 , 2026 thlenga neih tur he Spot Study Visit-ah hian MLA rualte hian India ram khawpui hrang hrang- Bengaluru, Mumbai, Kolkata leh Guwahati-a Mizoram House-te an fang kual a. Heng khawpui hrang hranga Mizo mipuite tana Mizoram House pawimawhna leh tangkai dan te, Mizoram House kalpui a nih dan te, a dinhmun mekte bakah, harsatna an tawh leh hmasawnna awm theite an zir chiang a. Committee zir chianna Report leh rawtna an neihte chu sawrkar bawhzui turin Assembly Session-ah pharh a la ni leh dawn a ni.

MLA te hian heng khawpui hrang hranga Mizo awmte nen inkawm hona hun an hmang a. Inenkawl tura phai ram pana kal, Mizoram House-a damlo thleng mekte pawh tlawh kualin an khawsak dan dinhmunte an en bawk a ni.

MLA te hian Bengaluru leh Mumbai-a Mizoram House hmun tur ram kan neih mek te leh Guwahati-a in ruhrel (structure) ding sa, sak zawh loha awm te pawh tlawhin an enfiah bawk a. Subject Committee-II hi Assembly Secretariat Official-ten tawiawmin, General Administration Department official-te leh Mizoram House enkawltuten an lo dawngsawng a ni.

Subject Committee II-ah hian Lt. Col. Clement Lalhmingthanga chu Chairman niin MLA pasarih - Pu H. Ginzalala, Pu V. Malsawmtluanga, Dr.R. Lalthangliana, Dr. K. Beichhua, Pu V.L.Zaithanzama, Pu R. Rohmingliana leh Pu Lalramliana te chu member an ni.