Kar kalta khan Pu R. Vanlaltluanga, Engineer-in-Chief, PWD hovin Chief Engineer (Roads) PWD; Superintending Engineer (Western Circle) PWD; Superintending Engineer, PWD Lunglei Circle; EE, PWD Lunglei Road Divison leh EE, PWD Hmuifang Division te nen Aizawl-Thenzawl-Lunglei kawngpui chu a hmunah enpuiin, siamthat ngai zual bik laite leh a thei ang ang he kawng pawimawh tak thawmthat dan a ruahmanpui a, ngaih pawimawh hmasak turte enin ruahmanna an siam nghal bawk a ni. 

PWD Hmuifang Division chuan he kawngpui hi 5 kmp-100 kmp huamchhung a enkawl a, sorkar kum kal lai 2017-2018 chhungin Maintenance Action Plan-ah cheng nuai 165 leh NEDP hnuaiah cheng nuai 70 ruahman a ni a. He Division hnuaia Sub-Division 3 - Aibawk, Sateek leh Thenzawl - huamchhung kawngdunga khuar hnawh, tui luan kawr thianfai leh hnim buk samfai te chu hna hmasaa nei turin E-in-C, PWD chuan a hrilh nghal a. Khawthat veleh hna hautak zawk thawh tan theih veleh Maintainance Annual Plan-a ruahman tawh angin khuar hnawh leh repair ang – pot hole repair, seal coating leh resurfacing te tan a nih thei nan khawl leh hmanruate a hmunah chekkhawl nghal turin a hrilh bawk. 

He kawngpui hi 100 kmp leh 164 kmp thlang huamin PWD Lunglei Road Division chun a enkawl thung a. He kawng enkawl nan hian 2017-2018 chhungin Maintenance Action Plan-ah cheng nuai 170 leh NEDP hnuaiah cheng nuai 100 ruahman a ni a. He Division enkawl huamchhungah hian kumin February thla atangin hmun 64-ah leimin awmte chu PWD-ten thei anga rangin an lo thianfai thin a ni. 

Kmp 100 leh kmp 143.7(Tlawng bridge) inkarah kawng chhiat zual bik khuar lian te chu October ral hmain khua a that dana zirin siam zo hman turin hmalak mek a ni a. Kmp 143.7 leh kmp 166 inkar (Tlawng Lei leh Pukpui inkar) kawng chhe lai bik hmun 4-ah Rigid Pavement (790 metres) siam tura ruahmanna siam chu a hmunah enin, hmalak dan tur an sawi ho. Heng hmun 4 te hi, an dinhmun enin concrete-a helai bawr chhun chu tha ber tura ngaih a ni a, kawng chhiat chhante sawihoin, tui luan dan leh leiminin helai bawr a tihbuai dan te pawh an enho a ni.  

PWD E-in-C leh hotu dangten Lunglei khawchhung kawngte pawh enin, siamthat ngai lai pawimawh bik te siamthat dan tur an ruahman nghal bawk a ni.