Vawiin khan PWD Engineer-in-Chief Conference Hall, Tuikhuahtlangah PWD Minister Pu Lal Thanzara hovin Public Works Department thawktute leh CYMA leh Sub-Headquarters hruaitute an inhmukhawm. Hei hi YMA General Conference Vawi-71 naa thurel, “Mizoram hmun hrang hranga inkalpawhna kan neih te hi tun aia tha leh changtlung zawka siam a nih theih nan Central YMA-in hma la rawh se” bawhzuina atan Central YMA leh Mizoram PWD hotute ruahman a ni. Minister chuan he hunah hian PWD Annual Report, 2016-17 a tlangzarh nghal a ni.
Minister Pu Lal Thanzara chuan ram hmasawnna hnuk pawimawh ber chu inkalpawhna a ni tiin, Mizoram kawngte a lo that a a lo changtlun zawk theih nan CYMA leh PWD in inkawmna hun remchang an siam chu lawmawm a tih thu a sawi a. Mizoram kawng dinhmun thalo leh duhthusamlo lai a awm thu te, Mizoram PWD in a enkawl chin kawng siamthat hna chu theihtawp a chhuah tur thu te Minister chuan a sawi a; chutihrual chuan state PWD in a enkawl chin nilo kawng engemawzah a awm thu te, chungah chuan sawrkar laipuiin a thawktu tur contractor a thlan thin thu leh an hnathawh kalphungah state sawrkar a inrawlh vek theih thin loh thu a sawi a ni. PWD Minister chuan PWD engineer-te chu an hnathawh naah theihtawp chhuah tura hrilhin, YMA hmalakna hrang hrangte chuan ram hmasawnna kawngah thui takin awmzia a neih thin avangin vawiin inhmuhkhawmna pawh chuan rah tha a chhuah ngei a beisei thu a sawi bawk.
Meeting-ah hian Chief Engineer (Highways), Chief Engineer (Buildings) leh Chief Engineer (Roads) ten an bial chhunga kawng siam mek leh enkawl hna hrang hrang te report pein, kalkhawmten sawihona hun an hmang zui a, hetiang inkawmhona hi a tul leh remchang anga la neih chhunzawm zel tura ruahman a ni.
Kum 2016-17 chhung khan PWD chuan hnathawh nan a vaiin Rs. 894.58 crores an hmang a; hetah hian Central, State leh pawnlam agency hrang hrang atanga sum hmuh bakah PMGSY atanga Rs. 75.53 Crores leh National Highway Fund atanga Rs. 56.38 Crores an hmuh leh revenue Rs. 7.94 Crores a tel a ni. Mizorama inkalpawhna State PWD in a enkawlte chu National Highway (1414.318 Km), State Highway (170 Km), Major District Road (601.40 Km), Other District Road (978.30 Km), Village Road (1863.147 Km), Roads within Towns & Villages (704.912 Km) leh City Road (297.410 Km) a thliar niin, a vaiin 6029.487 Km a thui a ni a. BRO enkawl kawng chu 896.315 Km a thui niin, CPWD in 175.60 Km a thui a enkawl bakah Department dang thenkhatin 419.90 Km a thui an enkawl ve bawk a ni.
Vawiin inkawmhona hi Pu R.Vanlaltluanga, PWD, Engineer-in-Chief leh Pu Vanlalruata, President, Central YMA ten an kaihruai a, Pu David L.Thangliana, Director, I & PR chuan a telpui bawk. Central YMA atangin CEC member leh Sub Headquarter hrang hrang hruaitute an tel a ni.
