Vawiin chawhnu khan Chief Minister Pu Lal Thanhawla chuan Thenzawl Bazaar Veng YMA Hall-ah NABARD - Cod NERC hmalakpuina  Ramlai Handloom Producers Organisation (RHPO) Project Mizoram a hawng.

 NABARD-Cod NERC Handloom Proiect,Thenzawl hawnna inkhawmah hian Chief Minister Pu Lal Thanhawla  chuan National Bank for Agriculture & Rural Development (NABARD) in India ram hmun hrang hranga thingtlangmite tihhmasawnna atana a thawh nasat sia a sawi a. Mizoram sawkar nena an thawhhona phri chu a tha hle a ni a ti a.Hlawkna umlo, tlawmngai pawl pakhat, Cod NERC ten Ministry of Textiles leh NABARD thawhpuia Thenzawl puantahtute tih hmasawnna tura hma an la chuan a tih phur thu sawiin Mizoram tan hmasawnna mel lung thar a ni a ti. Sawrkar hna ringawt beisei lo thalai zingah entrepreneur tia sawi tur an rawn pung zel chu lawmawm a tih thu sawiin NEDP hmalakna atangin entrepreneur tam zawk Mizoram innghahna atan tur chher chhoh mek an ni a ti.

"Sawrkar chuan mitin te sum leh pai peipun sak tumin kawng hrangah hma a la mek zel a. Hmalakna hrang hrang zingah  Handloom bikah hian mi tluk loh kan ni thei a; a chhan chu keini Mizote hian thilmawi midangte aia kan hriat zawk avangin", a ti a. Mizote puantah leh kutchhuak te chu a mawi bik tih a sawi a. Chief Minister chuan Mizo Handloom kutchhuak te chu a lo hlawk zawk  nan puantah ringawta insawrbing a hun tawh lo a ti a. Midangte duh zawngte  hriatfuh a, an mamawh tur chi te siamsak bakah kuthnu mam, hnamdangte it zawnga handloom kutchhuakte chu siam a ngai a ni a ti.

"Mizoten hun remchang kan neih phawt chuan kan thleng sang thei hle a. Inphochhuahna tha te kan neih theih chhoh zel phei chuan kan thilsiam leh design te hi manto taka mi in an lei duh vek a ni a. Tunah central sawrkar in silk ( Maimaw puan) lam a buaipui chho leh mek a. Hengah te pawh hian remchanna kan zawn zel a tha",  a ti a. 

Handloom lama kuthnathawktute, NLUP hnuaia kuthnathawktute leh mahnia thei tawp chhuaha tan lo la mekte bakah an mahni kaihruaitu sawrkar hnathawk inpe tak tak te avangin Mizoram chu NITI Aayog chhutdan chuan State hmasawnna tehna GSDP rate punnaah a sangfal 4 zingah a tel a ti a. " GSDP bakah India ram state zingah eitur khawpkhamlo tlemna ber state te kan ni leh zela, kuthnathawktute inpekna avanga kan state hmasawnna ah hian sawrkar aiawhin tanlatute zawng zawng hnenah lawmthu ka sawi a. Tanlakna tur lai erawh tam tak a la awm chungin hmalam duhawm tak kan nei a, kan hlawhtlinna te hi chhuanawm tak a ni", a ti a. Chief Minister chuan, " Tan dipla chho zel tur leh hnathawk thei tur chuan min ti hrisellotu, min ti hmel mawilotu leh min ti bala min ti rimchhetu Vaihlo zuk leh hmuam kuhva khawr ei leh kan thil chin thalo zawng zawng te kan sim vat a ngai a ni", a ti. Ramlai Handloom Producers Organisation (RHPO) project Mizoram chu a hlawhtlin ngei a beisei thu sawiin Thenzawl khua a puantahtute zawng zawng chu Handloom Facilitation And Export Hub hlawk taka hmangtu ni thei tura tang sauh sauh turin a chah a ni.

Thusawitu dang General Manager, Mizoram Pu RK. Srivastava chuan NABARD  chu thingtlangmite tih hmasawnna tura sawrkar leh Bank hrang hrang hnena loan pechhuak thin a nih thu a sawi a. Mizoram sawrkar nen tha takin an thawkho thin a, thawhhona tha zawk an neih chhunzawm a beisei thu sawiin tanla leh thahnem ngai taka hma la te tan NABARD chu dawr theih in a in hawng zel dawn a ni a ti.

 Hawnna hunah hian Cod Nerc Chairman Pu B. Lalchhanzova chuan inlawmna thuchah sawiin, NABARD PRO Pi. H.Lalhmachhuani'n  Project sawihawnna hun a hmang a. Rampum huapa Puantah lama chawimawina National Merit Certificate dawngtu pahnih - Pi Lalnunziri leh Pi Lalringzuali te hnenah chawimawina hlan a ni a. An ni pahnih hi Mizoram atanga Ministry of Textile in chawimawia a pek mi pathum zinga mi an ni a. Mizoram in hetiang chawimawina 3 a dawn lai hian Nagaland leh Tripura-ah te he chawimawina dawng hi mi 70 chuang ve ve an awm a ni. Khualzahawm NABARD General Manager, Mizoram Pu RK. Srivastava ten thu an sawi bakah, Pu C. Lalchhandama  Joint Director, Commerce and Industries, Govt. of Mizoram ten thu an sawi bawk a ni.

 Chief Minister in a hawn tak Handloom Producers Association Project hi NABARD in cheng nuai 15 revolving fund angin Producers Company in a pui anga, weavers company member te hian Rs. Nuai sawm panga vel an thawhkhawm ve bawk anga, NABARD in POPI atan Cod NERC hnenah Rs 17.18 lakh an pe leh anga, heng sum belhkhawm  Rs. 47.63 lakh bawr vel hian sumdawnna an tan thei dawn ani. He project thuamchak (converge) tur hian Mizoram sawrkar leh funder dangah te pawh tan lak chhoh zel tum ania, He project kal tlang hian website siamin handloom market tih chak nan bakah, Thenzawl hi handloom base tourist town anga cheibawl chhoh zel theih beisei ani.

He project hi NABARD puihna in Mizorama Professional NGO tanglai tak Cod Nerc kum thum chhung a enkawl dawn ani. He project puihna  hian Thenzawl Handloom Weavers mi 800 te chuan share thawh khawmin producers Company an din anga, chu company chuan puantahtute dehchhuah hralhna lam leh puantahtu te hamthatna a buaipui chho dawn a ni.

Cod Nerc, NGO enkawlna hnuaiah hian Puantahtuten Pawl/Company an din anga, chu Company chu dan ang thlapa in registerd in, Puantahtute a huhoa an sumdawn theihna tur leh an hamthatna turin hma an lakna tur a ni a. puantahtu member tin ten Cheng sanghnih  (Rs. 2000) theuh share an thawhkhawm anga, mi 800 ziah luh tur a ni ang.

 

 

Attachment

  • Loading attachment...