Pu John Rotluangliana, Minister FCS & CA, Tranport, Tourism Bialtu MLA chuan vawiin khan Mamit khawpui leh a chhehvela sawrkar hmalakna hrang hrangte a hmunah a tlawh.

Bialtu MLA hian NH 44 A Dampui Diversion, JNV, Polytechnic leh Govt Mamit College te a tlawh a. NH 44A Dampui Diversion sial hna thawh mek a tlawhnaah hian thawktute chuan lo dawngsawngin, Dampui Diversion laih hna hi zawhfel tep a ni tawh a, laih bak la awm hi km 8 vel a ni, kawng laih hna hi tun thal chhunga chak taka thawh a nih dawn thu thawktute hian an sawi a ni. Tunah hian Dampui Diversion sial hna thawh nan hian Hitachi 18 rawih mek a nih thu EE, PWD Highway chuan a sawi. Bialtu MLA hian Mamit chhimlam Thingkhuang rama JNV Building sak mek leh Mamit Hmar lama Polytechnic hmun te chu  tlawhin thawktuten an lo dawngsawng bawk a ni.

Pu John Rotluangliana, Bialtu MLA hian Govt Mamit College a tlawhnaah hian  Mamit College a thawktute chu an naupangte an zirtir chhuahah an thawhrah a lang dawn a ni a ti a, thiamna sang zawk leh tumsang tak nei tura naupang chherchhuaktu ni tur leh Export Quality hial chherchhuaktu ni turin a chah a. Thawhhona tha nei tur leh an zirlai nauoangte entawntlak a awm a, an incheina thlenga fimkhur turin zirtirtute chu a chah a. Zirlai naupangte pawh Graduate satliah mai nilova hna tha tak leh sang zawk thawk thei tura tumna nei tur leh he college atang hian State civil service leh central services Gr A leh B bakah Staff Selection Commission lamah te inziak tling thei tura tun atanga inbuatsaih lawk thiam turin a chah a, an zirlai mai piahlam General Knowledge thlenga ngaihven turin a chah bawk.Bialtu MLA hian Mamit To Aizawl kawng siam hna hi thawh mek a ni a. Tluang taka thawh zawh theih anih chuan hun reiloteah Mamit atanga Aizawl Office kai hman hial tur khawpin a la hnai dawn a ni a ti bawk.

Pu John Rotluangliana, Bialtu MLA hi Pu Lalrobiaka, Chairman ZIDCO,  Pi Lalbiaksangi District Bawrhsap, Pu Jocob Lalawmpuia Addl DC, Sawrkar Officials te leh khawtlang hruaitute’n an tawiawm a ni.