Vawiin khan PWD Minister Pu Lal Thanzara chuan Aizawl-Thenzawl- Lunglei Road ‘World Bank Road’ tia hriat, dinhmun leh rigid pavement hnathawh mekte chu Lunglei lam a pannaah a en a, amah tawiawmtu Chief Engineer(Roads) PWD Pu Lalrintluanga leh SE, Lunglei Circle, PWD C. Lalchhuana te nen rigid pavement hna bak pawh hna dang tun maia tih thei ang chi te a hmunah an sawi a, ruahmanna siam dan te an sawi a. Minister hi bialtu SDO ten an bial chinah zel lo hmuakin hma an lak dan leh an harsatna te an hrilh a ni.

PWD Minister Pu Lal Thanzara chuan Aizawl-Thenzawl-Lunglei Road chu Mizoram chhim lam tan chakkhai lakna kawng ber a ni a, lifeline a ni a, state highway kan neih a chuan a pawimawh berah, thei ang angin he kawng hi kan enkawl mek a, mahse state sawrkar enkawl ani a, sum leh pai duhthusam kan nei lova, chuvangin harsatna te nei thin a, mahse chuti chungin NEDP leh sum dang dang te ruahman in theitawp kan chhuah mek zel a ni, a ti.  Pukpui hnaih kawng chhe lai zuala Rigid Pavement hna kal mek hi zawh ani vat thei nan motor lian tan block a ni dawn a. Motor lian an kal rengin hna a sawt lova, chak zawka hnathawh ani thei nan he kawng hi block turin hma kan la mek a, ruahman dan chuan February ni 23 atanga thuneitu te nen inrawna block tum a ni, a ti a. Hmun tam taka khuar te chu hnawh mek ani a mahse hei hian rei a daih lova, carpeting estimate hi PWD hotute siam vat turin ka hrilh a, estimate hi peihfel vat tum a ni a, hemi atan hian NEDP sum awm ang ang te chu dap kan tum a, a tul anih chuan sawrkar kum thara rul turin a ba pawhin tih dan kawng zawn kan tum a ni, a ti. 

Pukpui leh Tlawng inkar kawng chhe lai zual bik hmun 9 a Rigid Pavement Work hi ruahman niin hna hi a kal mek a. SLT Infracon leh Tantia Construction te heng hna te hi an thawk mek a. Lung, rora leh balu te hi Mizoram awm ang ang a tha ber hman ani thei nan PWD lamin uluk takin hna an vil reng a, quality control a bik takin material testing pawh hi uluk thei ang berin kalpui mek a ni. Rigid Pavement atana lung hi Keitum bulah quarry ami hman niin km 100 velah thui ami phurh a ni. Balu pawh hi Saibuk ami hman a ni a.

Aizawl-Thenzawl-Lunglei Road hi World Bank sum a sial niin kum 2010 atanga khan Mizoram PWD kutah hlan niin in State Highway angin an enkawl a. National Highway te hi kum thum danah Sawrkar Laipuiin sum hmangin Periodic Renewal (resurfacing) tih ani thin a. World Bank Road hi siam anih atangin National Highway ani loh avangin  periodic renewal(resurfacing) tih a la ni lova, State Sawrkarin, state sumpai awm ang ang atangin a thawmthat leh a chhelai siamthat te hi a ruahman thin a ni.