Vawiin khan Mizoram Legal Services Authority (MLSA) bultumin Champhai Kahrawt YMA Community Hall-ah Legal Services Camp buatsaih a ni a. He hunah hian India khua leh tuiten an chanvo dik tak an hmuh theihna tura kaihhruaina dan inhrilhhriatnna na neih niin Sorkar Department hrang hrangten mipuite dawr theih tur leh thu zawhfiah theih turin Stall an hawng a ni. He hun hi Pu C.Lalhnunpuia, President, MJA Champhai District chuan khuallian niin a hmanpui a ni.
Pu C. Lalhnunpuia chuan Khawvel a Democracy ram ropui ber, State 29 leh UT 7 te infin khawm, mipui tluklehdingawn 1.34 awmna India ram mipuite tana Sorkar laipui leh State sorkar-ten hmasawnna rahbi hrang hrang a siamte mipui kut a a thlen ngei theihna tur leh mahni chanvo dik tak an dawn theuh theihna tura mipuite zirtir leh hrilhhriat tir chu tihmakmawh a ni, a ti a. Hetiang ruahmanna tha tak, mipui ban phak a awm theihna tur leh mipuiten an chhawr tangkai ngei theihna tura Sorkar laipui ruahmanna zulzui a mipuite dan leh hrai zirtirtu leh hrilhhretu bik Legal Services Authority-ten Champhai District a Legal Awareness Campaign an nei thei chu thil lawmawm tak anih thu sawiin, he Legal Awarness Camp hi tangkai taka hman anih ngei theih nan duhsakna a hlan a ni.
He hun MSLSA Member Secretary Pu Vanlalenmawia MJS kaihhruaiah hian SBI Champhai Branch, Mizoram Rural Bank leh Mizoram Co-operative Apex Bank Champhai Barnch-te atangin mipuiten tangkai lehzuala Bank an hman tangkai theihna tura ruahmanna thar chi hrang hrang tarlanna an neih bakah District Health & Medical Department, District Child Protection Unit (CDPU), District Sericulture Department, District AH & Vety Department, District Fisheries Department, Police Department, Horticulture Department, District Agriculture Department, Social Welfare Department-ten sorkar laipui leh State sorkar-in hmasawnna rahbi a kalpui mek dan Power Point hmangin sawifiahna an nei hlawm a ni.
He hun hmanpuitu Mizoram Motor Accident Claims Tribunal (MACT) Presiding Officer, Pu KL Liana MJS leh Senior Advocate Pu KV Tlangmawia ten Court-a thubuai ngaihtuah anih dan leh hremna pek anih dan phung tlangpui tarlanna an neih bakah mipuite Court (Lok Adalat) chungchang sawifiahna an nei a. Champhai Kahrawt Field-ah Sorkar Department hrang hrangten dawr hawngin, sorkar in hmasawnna rahbi hrang hrang a duante mipui hnena tlangzarhna leh mipuiten an thu hriat duh leh zawhna an neihte an zawt nghal a. Sorkar Department hotute hian mipuite hnenah hrilhfiah sakin, an hmalakna kawng hrang hrangte an puangchhuak nghal bawk a ni.
