Vawiin khan Pu Joseph Lalhimpuia, Chairman Mizoram Youth Commission chuan Lunglei khawpui chhunga  Higher Secondary School Principal, College Principal te leh Lunglei DC aiawh Pu H.Lalrinpuia DCSO te a chenna in Chanmari Lungleiah kawmin IIT JEE & NEET  coaching kalpui dan tur a sawi pui.

Pu Mahima chuan chhim lam thalaite zirna sang zawka an kal theihna tur IIT JEE & NEET entrance an paltlang theih dan tur ngaihtuahpui a tul thu sawiin, ALS leh Excel Delhi lam nen pawh an inbiak tawh thu sawiin, VSAT link hmangin online coaching an rawn pe thei dawn a ni a ti a, offline coaching pekna tur kan ngaihtuah ho a tul a ni tiin. An course fee 75% chu MYC in a tum sak theih tur thu sawiin a tling an awm anih chuan an fee chawi 25%  pawh re-imburse tir leh vek an ni ang a ti a. Hetiang coaching hi Lunglei leh Aizawl ah buatsaih tum a nih thu a sawi bawk a ni. Sawi ho anih hnuin kumin atangin coaching hi kalpui ve tha an ti a, MYC, School Education Dept leh District Administration te nena thawhho ni se an ti a ni. Co-ordinator & Chairman atan Lunglei DC dah ni se an ti a, Lungleia thahnemngaihna atanga nikum lama coaching lo kalpui tawh te nen pawh a tul anga inrawn leh ni se an ti a. Online coaching tihna tur Class room pawh Lungleia sorkar Higher Secondary School hovah an neih sa thu report a ni bawk.

IIT-JEE Entrance test hi Aizawlah April 8, 2018 ah neih a ni dawn a, NEET hi May 6, 2018 ah neih a ni thung ang.