Nimin khan Lunglei District MJA member-te NEDP Press Study Tour nei a Champhai District-a hun hmang mek te chuan Mizorama khaw fai ber nihna hauh mek  leh India ram puma khaw fai ber nih tuma tan la mek tu Biate khua an tlawh. 

Press Study Tour member - te hi Biate khawtlang hruaitute, YMA, MHIP, MUP hotute, Biate khua Faina Ambassador-te leh khawtlang mipuiten lo hmuakin an khaw chhunga faina kawnga an hmalakna hrang hrang te a hmunah an en pui a. 

Faina chungchang sawiho turin BNRSGK Hall-ah Biate VCP Pu RV Hluna kaihhruaina hnuaiah inkawmhona hun hman a ni a. He hunah hian NEDP Press Study Tour kaihruaitu Lunglei DIPRO Pi C. Lalremruati chuan thu sawiin Biate khawtlang hruaituten phur taka an lo dawnsawn avangin an chungah lawmthu a sawi a. UD&PA Department buatsaih Mizoram Khawpui Fai Inelna 2017-ah Biate khua in Mizorama khaw fai ber nihna an hauh chu an phu takzet a ni tiin khawtlangin faina kawnga hma a lak chu a fakawmin a entawntlak hle a ni, a ti. 

He hunah hian faina chungchang sawihona neih niin faina kawnga hmalakna leh hmachhawpte, bawlhhlawh lak khawm leh sawngbawl dan, faina in hriselna kawnga nghawng a neih hrang hrang te, ran vulh dan, India rama khaw fai ber ni tura Biate khaw hmalakna te sawihoin inkawmhona hun tha tak an hmang.