Vawiin nileng khan Assembly Annexe Conference Hall-ah Social Welfare Department chuan National Commission for Protection of Child Rights (NCPCR), New Delhi nena tangkawpin naupang dikna chanvo humhalhna Dan -Juvenile Justice (Care and Protection of Children) Act, 2015 leh Protection of Children from Sexual Offences Act, 2012 chungchang zirhona hun pawimawh tak an buatsaih. Workshop hawnna inkhawmah hian Social Welfare Minister Pu PC Lalthanliana chu khuallian a ni.
Pu PC Lalthanliana chuan naupang te hi ram nghahfak an ni a, nulat tlangval an hriat tak tak hma, naupang an la nih laiin kan tuaihriamin enkawlna tha kan pe tur a ni, a ti a. Boruak muanawm leh hlimawm tak kara chawilen ngai, rilru leh taksa tana pawi thei thil laka venhim mamawh, naupangte kan enkawl danah hian kan hnam thanzel dan tur a innghat, a ti. Naupang pualin Dan bil pahnih JJ Act leh POCSO Act te sawrkarin a siam a, hei hi hlawhtling taka kalpui a tul tiin hemi kawngah Mizoram sawrkar chuan bung thar a kai a, State Commission for Protection of Child Rights pawh reilote ah office hrang neiin hawn a ni ang, Social Welfare Minister chuan a ti a. Social Welfare Department hian inrelbawlna kawngah te, hmasawnna ruhrel din kawngah te, mawhphurhna an kova tla hlenchhuahna kawng hrang hrangah kum sawm chhungin hma a sawn nasa hle niin a sawi bawk.
New Delhi atangin he hun hmang tur hian NCPCR member ni lai Pu Yashwant Jain a lo zin a. Workshop hawnna inkhawma thu a sawiah naupang dikna chanvo humhim pawimawhzia hriain sawrkar chuan dan tha tak tak a siam a, heng dan a siam te hi eng chen nge kan tihhlawhtlin tawh tih leh hma kan sawn zel dan tur ngaihtuah hi workshop-in a tum a ni, a ti.
Hawnna inkhawm hi Social Welfare Department Director Pi Laldikkimi’n a kaihruai a, thupui thlan bik hrang hrang hmangin mi thiam sawm bik ten thu an sawi a. Juvenile Justice (Care and Protection of Children) Act, 2015 leh Protection of Children from Sexual Offences (POCSO) Act, 2012 kenkawh chungchanga harsatna an tawh leh harsatna awm theite sawi hovin, tha zawk leh awmze nei zawka kenkawh dan tur tur an ngaihtuah a ni. Workshop-ah hian Social Welfare Department bakah Guwahati High Court, District & Sessions Judge, MZU, SCERT, Mizoram State Legal Services Authority, Police, Health, Child Welfare Committee, Juvenile Justice Board, Children’s Home, YMA, MHIP leh NGO hrang hrang aiawh an tel a ni.
