Vawiin khan PWD Minister Pu Lal Thanzara chuan Chanmari atanga Israel Point via Electric Veng kawngsiam mek a hmunah enpuiin, PWD Official-te kawmna a nei bawk a ni. PWD Minister hi Food, Civil Supplies & Consumer Affairs Minister Pu John Rotluangliana chuan a tawiawm.

Kawngsiam mek-ah hian Pu V.Lalliana Building leh MUP Waiting Shed, Dawrpui Veng inkar  hi Interlocking Concrete Paver Block (ICPB) hmanga siam a ni a; metre 160 a sei, metre 6 a zau a ni. Interlock block hi Zig Zag Pattern niin, a chhah zawng hi 88mm a ni a, per meter square-ah block 39 hman a ni. ICPB atan hian tui chhe paihna tha a pawimawh avangin tuihawk luan kawr siamthat a ni a. Helai kawng hi Gradient a san avangin Anchor Beam pawh standard-ah chuan metre 20 dana siam thin chu metre 5 danah siam niin, luikawr sir ve ve (confinement) pawh RCC a siam a ni. Kawng siam tura ruahman hi Km 1 vela sei niin, ICPB Road bak hi bituminous hmanga siam tur a ni. Avaia sumsen tur hi NEDP atangin Cheng Nuai 22 a ni.

ICPB hi tui pek ngai lo leh Paver Block phah zawhah Motor a tlan theih nghal niin, siam zawh hnuah pawh awlsam taka enkawl theih a ni. Block rem nan hian khawl hman a ngaihloh avangin environmental friendly a ni.