Vawiin khan PWD Minister Pu Lal Thanzara chuan a bial chhung, Edentharah  Community Complex Building thar a hawng.

Pu Lal Thanzara chuan Mizo hnam chu pawl lian tak tak pathum - kohhran, sakhua leh sawrkar in a phuar khawm a,  heng lungthu pathumte hi an tanho that apiangin  mipuiin malsawmna an dawng thin, a ti. Minister chuan a bial chhung Edenthar vengah hmasawnna hrang hrang a thleng nasa a, hmasawnna hian ruhrel siam mai bakah mihring nuna hmasawnna, khawsakzia leh ngaihtuahna thlenga changkan chhoh zelna a kawk a ni, a ti a. Mi chanhai leh harsa zawkte tanpui hian hmasawnna a thlen a, chu chu midangte tana malsawmna kan nih theihna tha ber a ni, a ti. Edenthar-in Hall lian leh changtlung tak an nei thar chu a lawmpuizia sawiin Pu Lal Thanzara chuan a hmangtu leh enkawltu mipuiten neitu thinlung pu a, fai leh thianghlim taka enkawl turin a chah a, hall hawn thar tak hian nasa zawkin khawtlang hmasawnna, inlungrualna leh thawhhona tha a thlen ngei a beisei thu a sawi a ni. 

Edenthar  Community Complex sak nana sum ruahman hi cheng nuai 481.52 a ni a, January ni 1, 2017 khan sak tan a ni. Chhawng li a sak niin floor area zau zawng belhkhawm hi 1528 sqms a ni a. Badminton court, board games khelhna room, lirthei dah nana hman theih nghal multi-purpose hall, office room pahnih bakah skill development room te dah a ni. Community Complex sak nan hian tun dinhmunah Ministry of DoNER atangin cheng nuai 243.72 hmuh a ni a, State sawrkarin a do letna cheng nuai 27.08 a pe tawh bawk. NEDP atangin Community Complex panna tur kawng hi cheng nuai 15.06 sengin chei that a ni. 

Hawnna inkhawm hi Edenthar Local Council Vice Chairman Pi TC Lalropuii’n a kaihruai a. Local Council Chairman Pu G.Lalramzauva’n inlawmna thu a sawi a, Edenthar Branch YMA Secretary Pu Ricky Vanlalnghaka leh PWD Project Circle S.E. Pu Lalruatkima ten report an pek bakah Edenthar chhunga tlawmngai pawl hrang hrang - Branch YMA President Pu Anthony Lalhriatpuia, MHIP President Pi Lalthanzami leh MUP President Pu C.Roliana ten thu an sawi a ni.