4197/2025-2026

28th January, 2026 : Vawiin chawhnu khan PWD Minister Pu Vanlalhlana chuan Leitan leh Sihphir inkar kawngpui siam that hna thawh mek chu a hmunah endikin, Durtlang khawtlang hruaitute nen inkawmna hun an hmang nghal a ni.

Pu Vanlalhlana chuan sawrkarin kawngpui siamna tura sum a pekte chu a nih dan tur ang taka hman a nih avangin sawrkar sum daihzai zawkin hman a nih thu a sawi a. Kawngpui hi kan ram hmel lanna a ni tiin tunah chuan kan thalaite hmel pawh a tha a ni, a ti. Kawng siam meka Joint Action Committee-in vilpui tura mawhphurhna a lak chu fakin khawtlangin kawng tha a duh a tilang a ni, a ti a. Tunhmaa vantlang thil enkawl sawrkar tih tur chauha kan ngaihna chu kan kal pel tawh a, tunah chuan mahni ta angah ngaiin, dim nachang kan hre ta hi a lawmawm hle a ni, a ti bawk.

Chief Engineer (Highways) Er. Robin Lalrinawma leh SE, Central Circle Er. Lalrinngheta ten PWD aiawhin thu an sawi a. He kawngpui siam tura ruahmanna an lo siam tawh dan leh hmachhawp awmte an sawi a. Zuangtui leh Selesih inkar siamthat hna chu he kawngpui thawh zawh ruala thawh tan ve nghal a nih tur thu tarlan a ni. Khawtlang hruaitute pawhin kawng siam danah an lungawi thu lo sawiin, khawtlang mamawh hrang hrang an thlen nghal bawk a ni.

‘Widening and Improvement of Leitan to Sihphir’ km 10.25-a thui a ni a. Central Road and Infrastructure Fund (CRIF) hmangin SLT Infracon Pvt Ltd.-ten an thawk mek a, tun atang hun reilotea zawh beisei a ni.