4198/2025-2026

Lunglei, 2026 Pawlkut thla ni 28: Vawiin khan Lunglei District chhunga Lungsen Aspirational Block-a hmasawnna tehfung (indicator) hrang hrang hlen chhuah a nih theih nana NITI Aayog hnuaia beihpui thlak tur, Sampoornata Abhiyan 2.0 chu Block Development Officer (BDO) Pu Lalhruailiana Zote chuan BDO Complex-ah a hawng.

He campaign hi Aspirational Districts Programme (ADP) leh Aspirational Blocks Programme (ABP) hnuaiah thla hnih leh a chanve chhung, January 28 aṭanga April 14, 2026 thleng kalpui a ni dawn a. India ram puma Aspirational District 112 leh Aspirational Block 513-ahte kalpui tur niin, chu'ng zingah chuan Lungsen Aspirational Block pawh hi a tel a ni.

Lungsen BDO chuan Sampoornata Abhiyan 2.0 hi Sampoornata Abhiyan 1.0 hlawhtlinna chhunzawmna a nih thu a sawi a. Sampoornata Abhiyan hmasa zawk kal tlangin Lungsen Block chuan kawng tam takah hmasawnna leh hlawhtlinna a hmu tih sawiin, Sampoornata Abhiyan 2.0 hnuaiah pawh thawktute leh mipuite ṭan rualna ṭha tak avangin hmasawnna nasa zawk hmuh leh ngei beisei a nih thu a sawi.

Sampoornata Abhiyan 2.0 hnuaiah hian Lungsen Aspirational Block chhungah hriselna leh chaw ṭha (health and nutrition), zirna, leh kut hna thawh kaihhnawih tehfung paruk (6 key indicators) bitum bik neiin hma lak a ni dawn a. Chu'ngte chu: ICDS hnuaia naupangte chaw ṭha pek, Anganwadi centre-a naupang rih zawng leh san zawng dik (measurement efficiency), Anganwadi-a inthiarna leh tui thianghlim hnianghnar neih, sikula hmeichhe inthiarna ṭha tawk siam leh bawng vulhte hri danna (vaccination) pek ṭhat te a ni.

Lunglei District Bawrhsap chuan Lungsen Aspirational Block chhunga Sampoornata Abhiyan 2.0 kalpui turah department hrang hrangte chu NITI Aayog hun duan (campaign calendar)-te ṭha taka zawm a, hlen chhuah tum tur te, an thil tih apiang ṭha taka chhinchhiah tur leh hmasawnna (progress) report te pawh a hun taka theh lut ṭhin turin a chah.

Vawiina Lungsena Sampoornata Abhiyan 2.0 hawnnaah hian department hrang hrang thawktute leh khawtlang ai awhte an tel.