Tukin zing khan New Secretariat Complex-ah PWD Minister Pu Lal Thanzara chuan PWD division 20 ten kawng siamna atana an hman tur JCB 3DX Super Backhoe Loader (20 Nos), Tipper TATA LPK 912 (20 Nos), Bolero Pickup 4 Wheel Drive (10 Nos) a vailiam.

Minister chuan thu sawiin PWD hnuaia division 20 ten an mamawh em em, tun hmaa an neih ngailoh hma an lakna tura tangkai tak tak an nei thei chu lawmawm a tih thu sawiin PWD tan chuan ni chhinchhiahtlak tak a nih thu a sawi a. Kawng tha neih a nih theih nana PWD ruahmanna hrang hrangah tlawmngai pawlten min tawiawm thin chu a lawmawm hle a ni tiin Kawng tha neih a nih theih nan YMA nen pawh kan thawkho chho mek a ni, a ti a. Kawng chungchanga hmasawnna a awm zel theih nan kawng thalo lai te PWD hnathawkte hnena hriattir thin turin NGO-te chu a sawm a. Khawl tharte chu a enkawltuten mahni khawl anga en a, hmanna tur dik taka hmang turin a chah bawk a ni.

PWD hian kawng 6127.789 km a thui a enkawl mek a. Heng khawl tharte hi uluk taka ngaihtuahna senga lei an ni a. Heng vailiam tak bakah hian VMT 330 Mini Tandem Vibratory Compactor (20 Nos), Bolero Pickup 4D (10 Nos), UI Spot Mix (Mini Hot Mix Machine) (20 Nos) lei tawh niin Aizawl an thlen thuai beisei a ni a. Primax P-5 Concrete Mixer (20 Nos) pawh lei tel niin PWD Complex, Zuangtuiah dah an ni. Heng khawl hrang hrang te hi Rs. 13.68 crores senga lei an ni.

PWD Principal Secretary Pu Lalram Thanga, IFS chuan kalkhawmte lawmna thu a sawi a. PWD E-in-C Pu R. Vanlaltluanga atangin technical report ngaihthlak a ni a. PWD hotute leh hnathawkte, I&PR Director leh hnathawkte an tel a ni.