2418/2026-2027

Aizawl dated 29th September 2026: October ni 1 atanga Sairang, Aizawl - Lamka, Manipur inter-State Bus Service tur, mi 21 chuan theihna Bus pahnih chu vawiin khan Transport Minister Pu Vanlalhlana’n Transport Office tualzawl, Chaltlang atangin a vai liam a. Er. H.Ginzalala, MLA, Adviser to Chief Minister (Technical) chuan he hun hi hmanpuiin, Mizoram State Transport Authority member-te, Transport Department-a thawktute leh VK Tawna Travels enkawltute an tel a ni.

Transport Minister Pu Vanlalhlana chuan, hnam ropuia insiam tur chuan tlang hrang hranga cheng zohnahthlakte kan inlungrual a pawimawh thu sawiin, Mizoram chu zohnahthlakte inpui a nih thu a sawi a. Manipur-a chi leh chi inkara buaina thleng avanga zin veivah kawnga zohnahthlakten harsatna an tawk thin chu pawi a tih thu sawiin, vawiin program hmanna hian Manipur leh Mizoram inkar zin veivakte harsatna thui tak a sutkian ngei a  beisei, tih a sawi a. Inunauna, inluangrualna leh inpumkhatna tha zawk siamna kawnga hmanraw tangkai tak a nih ngei a beisei thu a sawi bawk a ni.

Er. H.Ginzalala, Adviser to Chief Minister (Technical) chuan hmasawnna siam tura thil pawimawh berte zingah kawng hrang hranga inkalpawhna (Connectivity) tha neih a nih thu a sawi a. Manipur-a chi leh chi inkara buaina chhuak hian Mizorama mizo chengte leh Manipur-a zohnahthlakte inkarah inpumkhatna tha a siam zel nia a hriat thu a sawi a. Thil tha chauh inzirtawna, inentawna, inkawhhmuhtawn turin kalkhawmte a chah a, Mizoram chu dan leh thupek ngaih pawimawhna hmun a nih angin, chung ang mizia chu chhawm nung zel turin khualzinte pawh fuih a pawimawh tur thu a sawi bawk a ni.

Pu Siamnunlian Valte, CEO, VK Tawna Travels chuan VK Tawna Inter-State Bus Service kalpui dan tur chungchang sawi zauna a nei a. Er. R.Lalrammawia, Director, Transport Department chuan Inter-State Bus Service chungchanga hriattur pawimawh hrang hrang a sawi bawk a ni.

VK Tawna Inter-State Bus Service ah hian Bus pahnih, mi 21 ve ve phur thei an tlan dawn a. Lamka, Manipur leh Sairang, Aizawl inkar nitin Bus Service a awm dawn a ni. Sairang – Lamka inkar hi km 360 bawr vela hla niin darkar 12 vel thang tura ngaih a ni a. Bus chuan man hi Cheng 2,500 a ni ang a. VK Tawna Bus Service Mobile Application hmangin on-line in Bus ticket hi a book theih bawk dawn a ni.