2846/2024-2025

Dated Aizawl, the 5th November, 2024: Vawiin chawhnu dar 1:00 khan Mizoram Upa Pawl, Chaltlang Branch chuan an pawl din champhaphak kum sawmngana (Golden Jubilee) chu Tourist Lodge, Chaltlang Mualvengah an hmang a. He hun hi PWD Minister Pu Vanlalhlana, bialtu MLA ni bawk chuan khuallian niin a hmanpui a, Jubilee puala buatsaih MUP Directory a tlangzarh nghal bawk a ni.

Kalkhawmte hmaah hian khuallian Pu Vanlalhlana chuan lawmpuina leh fuihna thuchah sawiin, MUP Chaltlang Branch-in kum sawmngana hmel a hmu thei chu a lawmpui takzet thu a sawi a. MUP member-te chu Mizoram innghahna pawimawh tak an nih thu leh an tawnhriatte chu khawtlang tana rohlu a nih thu sawiin, MUP member-te chu kan tobul min hriattirtu leh history a taka kan hmuh theihte an ni, a ti a. Chhuan lo awm zel turte hnenah an thiamfinnate hlan chhawng zel thei turin an kianga hun tam zawk hman a tul hle tih sawiin, mihring kumbi chhiarah upat chu natna ni lovin hnehna a nih zawk thu a sawi a. Khawvel inher danglam zelah upate chu thalaite finchhuah tura thawhpui turte, hmasawnna hna thawhte thlenga uluk taka vilpui thin tur leh ram rorelnaah pawh ram hruaitute finchhuahtu nih tum zel turin a chah nghal bawk a ni.

Vawiina MUP Chaltlang Branch-in Golden Jubilee an lawmna hunah hian Darkhuang vawi 50 vuaa bultan a nih hnuah Jubilee puala hun hman chhunzawm nghal a ni a. Maj. Chawnglianthuama (SA Rtd.), President, MUP Chaltlang Branch chuan inlawmna leh hun hman dan tur sawi hawnna neiin, Rev. Mangchhuana Sailo in hunserh a hmang a. Pu B. Lalchhuanliana, Vice President-in Chaltlang Branch MUP chanchin tlangpui a sawi a. MUP member boralte sunna hun hman niin, hruaitu hmasate, bial vawngtute leh MUP Tlangau semtute chawimawina hlan an ni a. Dr. Malsawma, Secretary, MUP Chaltlang Branch chuan lawmthu sawiin hun hman hi a khar a ni.

MUP Chaltlang Branch hi kum 1974 November ni 3 khan unit dina bultan a ni a. Kumin hian an din tan ni tak hi Pathianni nena a inan avangin vawiin lamah jubilee lawmna hun hi hman a ni ta zawk a ni.