3421/2024-2025

Aizawl dated 7th December 2024:  Vawiin khan Pu Vanlalhlana, Minister, Public Works Department chuan Sihhmui a Tlawng bridge rem khawm tawh, dawh kai tur enchhinna, 'trial launch' neih ṭan chu a hmun ah a enpui a. Er. H.Zoramliana, Chief Engineer, Highways, Er. Robin Lalrinawma, SE, NH Circle 1, Er. PC David Lalrinawma, Sr. EE leh Er.R.Lalthanmawia, Sr. SDO ten an tawiawm a ni.

PWD Minister Pu Vanlalhlana chuan Mizoram kawng pawimawh tak thlunzawmna tur Tlawng lei remkhawm mek chu hlawhtling tak a dawh fel a nih thuai theih nan vawiin hian uluk takin tihchhinna 'trial launch' neih ṭan a nih thu a sawi a. Khawvel thiamna changkang tak hmang a lei remkhawm leh a dawh hna hi kalpui a nih avangin hun engemaw chen kawng khar a ngai chu pawi a tih thu sawiin inkalpawhna tha leh rintlak zawk kan neih theih nan he kawng zawhtu mipuite chu hun rei lo te chhung lo la dawh hram hram turin a ngen. Ruahman ang a hna kalpui a nih chuan kar leh chhung hian lei hi dawh kai hman beisei a nih thu a sawi a, lei dawh kai atanga ni 120 chhungin lirthei engchi pawhin a zawh theih tur a hawn hman tum a nih thu a sawi. 

Chief Engineer Zoramliana tarlan danin Tlawng bridge thar tur hi ton 450 vel a rit niin metre 90 a thui a ni a, 70R loading Class a nih thu a sawi a. Lei hi hrui hmang a khai phei a ni dawn a, minute khat ah centimetre 30 zelin pawh phei a ni ang a, darkar 6 aṭanga darkar 8 chhung a pawh kai hman beisei a nih thu a sawi. 

Tlawng lei hi 'Network Inclined Arch Bridge' a ni a, Poddar Infratech Pvt. Ltd., Delhi ten hna hi March 27, 2021 atang khan an thawk tan a. Project kalpuina atan hian MoRTH atangin Rs. 36.99 Crore ruahman a ni. Lei thar hlan fel a nih hun ah kawng hi lei hlui lam motor zawh theih a hawn theih beisei a nih thu thawktute chuan an sawi.