3422/2024-2025

New Delhi, the 7th December, 2024: India hmar chhak puala buatsaih, Ashtalakshmi Mahotsav chu nimin chawhnu dar 3:00 khan Prime Minister Shri Narendra Modi chuan New Delhi-ah a hawng a, Mizoram sorkar aiawhin Pu Lalnghinglova Hmar, Minister of State, Sports & Youth Services, LESDE leh Excise & Narcotics chu a hawnnaah a tel. 

DoNER Minister Jyotiraditya Scindia bakah hmar chhak state-a Chief Minister-te he hawnna hunah hian an tel a, Pu Lalnghinglova Hmar hi Mizoram Chief Minister Pu Lalduhoma aiawhin a tel a ni.

Ashtalakshmi Mahotsav inkhawmpui hi vawiin khan hman chhunzawm niin, chawhma dar 11:00 ah “Towards Prosperity: Catalysing North East’s Progress for a Viksit Bharat” tih thupui hmangin hmar chhak state-a Chief Minister te nen panel discussion neih a ni. 

Mizoram Sports Minister Pu Lalnghinglova Hmar chuan he hunah hian Mizoram leh hmar chhak state-te hmasawnna tur hrang hrang a sawi a, sports chungchang bikah Khelo India Scheme kaltlanga sum hmuh thin chuan hmar chhak state mipui, sports ngaina takte mamawh a phuhru zo meuh lo, a ti a. Prime Minister Narendra Modi kaihhruaina hnuaiah India-in Olympic 2036 thlen a dil thu leh inbuatsaih a țul thu sawiin, “India sawrkarin Olympics thlenna tur sports infrastructure ropui leh changkang tak tak a din thei ngei ang, mahse chung infrastructure-ah te chuan tunge inel dawn, tih kan inzawh a ngai. India tan Olympics thlen chu zahthlak-a a chan lohna’n tun atangin hma kan lak nghal char char a tul tawh a ni, ” tiin hmasawnna tura rawtna a neihte a thlen. 

Pu Lalnghinglova Hmar chuan India hmar chhakah sports talent a awm a, mumal taka investment kalpui a nih phawt chuan Olympics 2036-a India hlawhtlinna kawng sialtu pawimawh tak a ni thei a ti a, "North East-a sports hmasawn zel nan Ministry of DoNER in hmar chhak state-te special status dilsak thei se," tiin rawtna a siam bawk.

DoNER Minister hian Mizoram Sports Minister rawtna thu țha a tiin project țha tak nen amah dawr zui turin a hrilh nghe nghe a ni. 

December 6-8 chhung neih tur Ashtalakshmi Mahotsav-ah hian hmar chhak puala hun hman niin state pariat ațangin an thlai, pamgpar leh thei thar chhuah hrang hrang leh kutthemthiamna hmanga an thil siamte pho chhuah a ni a, mithiamte subject hrang hranga an inrawnkhawmna hun buatsaih a nih bakah zai, lam, lemchan, fashion show leh hmar chhak pholanna tur thil chi hrang hrang entir a ni.