3423/2024-2025

2024 Pawltlak thla ni 7: Lunglei Officers' Club (LOC) member-te'n Lunglei khawpui chhunga mi rethei leh khawsak harsate'n kum 2024 Krismas hlim taka an hman theih nana ṭanpuina tur sum an thawh khawm, Christmas Charity ₹ 1,50,000/- (cheng nuai khat sing nga) chu vawiin khan Young Mizo Association (YMA) Sub-Headquarters Lunglei hruaitute kutah a mamawhte hnena an lo hlan chhawn atan an hlan.

Land Revenue & Settlement Office, Lungleia Christmas Charity sum inhlanna hun buatsaih hi LOC Assistant Secretary Er Lalropuia Hmar, Sr EE PHED LWSMD chuan kaihruaiin, Dr Zoramthangi Renthlei, Dental Surgeon, Civil Hospital Lunglei chuan hunserh a hmang a. LOC Treasurer Pi C. Rothangpuii, Principal, Nursing School Lunglei chuan report pein, LOC President Pu Francis Lalnuntluanga Ralte, Commandant, 2nd Bn MAP chuan Charity sum chu Lunglei Sub-Headquarters YMA Secretary Pu Zothanzuala Hnamte kutah a hlan a. LOC Secretary Pu Beitlotha Nohro, Settlement Officer, LR&S chuan lawm thu sawiin hun a khar a ni.

Charity sum inhlanna hunah hian LOC member eng emaw zat telin, Sub-Headquarters YMA aṭangin Secretary, Treasurer leh Finance Secretary te an tel a. Ṭanpuina sum hi Sub-Headquarters YMA chuan Krismas vuakveta Lunglei khawpui chhunga khawsak harsa, ṭanpui ngaite hnenah a ṭul danin an sem dawn a ni.

LOC hi December ni 18, 2023 khan din niin, nikum Krismas vuakvetah khan mi harsate leh ṭanpui ngaite ṭanpui nan charity concert buatsaihin chhungkaw 21 hnenah ṭanpuina an lo hlan tawh bawk a ni.

LOC hian vawiin khan an Vice President Er Laltlanchhunga, Sr EE PHED RWD Lunglei, November 2024-a superannuation pension-a chhuak thlahna leh Krismas ur lawkna hun buatsaih zuiin, tlaiah zanriah an kil ho nghal bawk.