3950/2023-2024

Aizawl, 24.02.2024: Tukin khan PWD Minister Pu Vanlalhlana leh Assembly House Dy. Speaker Pu Lalfamkima te chuan Khamrang leh Buichali inkar kawng dinhmun enfiahin a hmunah an kal. Kawng chhe lai te thlithlai in siamthat dan tur te an ruahman.  PWD Engineer te'n an tawiawm a ni.

Khamrang to Buichali inkar kawng hi km 14.80 a thui a ni a. Helai hna hi contractor Ratna Infrastructure Projects Pvt. Ltd. thawh niin, ni 07.05.2021 khan an thawk zo a, tichuan maintenance period hi ni 07.05.2026 a thleng tur a ni. PWD report a inziah danin hemi kawng hi ni 16.11.2021 khan NHIDCL hnenah Mizoram PWD chuan a hlan tawh a, nimahsela NHIDCL hian PWD leh Ratna Infrastructure Projects Pvt Ltd. te contract a la tawp lo tiin hemi kawng hi kut an thlak duh ta lova. He kawng hi Contractor hian Maintenance chu ti chho ve zel mahse ni 25.08.2023 atang khan an tawp san ta a ni.

Tichuan contractor in an tawp san hnu chuan kawng a chhe bawk si nen PWD chuan helai kawng chhe zual hi boulder te hnawhin a thenlai chu concrete pavement siamin a thawk ta a. Boulder pawh cubic metre 2387.05 hman a ni a, concerete pavement pawh metre 213 a thui a siam a ni. He hnathawhna pawh hi fund hmuh a la ni lo a, SASCI atang a hmuh tur a ruahman niin, sum hi awm tawh mahse release a la nih loh avangin department chuan a la ba a ni.

Tunah hian contractor ten hna an tawp san avangin an contract chu February ni 23, 2024 khan Terminate/Foreclosed a ni ta a, contractor pawisa (Performance Bank Quarantee) Rs. 73.00 lakhs chu tunkar khan encashed tawh niin, he sum hmang hian hna thawh tum mek a ni ta a. A kawng chhe zual lai te assessment siam a ni a, tichuan Boulder cubic metre 2700 vel hnawh ngai tur a chhut a ni a. Kawng khuar lai chu JCB hmanga laih a, chumi hnuah chuan boulder hmang hnawh tum a ni. Heng hna bak hi chu tun dinhmunah chuan pawisa han a daih hrih dawn lo a ni.