3951/2023-2024

Dated Siaha 23rd February 2024 : Nimin chawhma dar 1 khan Pu Lalhmunsanga Hnamte, District Bawrhsap chuan Tliatlu Tlang panna lungphun a phun a. District Bawrhsap hi Pu Viasai Solo hi E.E (PHED), Pu Vanlalchhuanliana, Election Officer, Pu J. Lalhmahruaia (SDC) bakah DC Office Staff- ten an tawiawm a, Chheihlu mipuiten Chheihlu Community Centre -ah lo hmuakin hetah hian inkawmna tawi neih a ni.

Pu Lalhmunsanga Hnamte chuan khawtlang hruaitute- VC, MTP,MCHP, MSO leh Chheihlu mipuiten duhsakna an hlannaah lawmthu a sawi a. Pu Lalhmunsanga Hnamte chuan khawtlangin mamawh an lo thlente chu theihtawp chhuahpui a tum thu a sawi a. Deputy Commissioner Office- atanga tihfel vek theih lohte pawh a khawihtu bik Department- hotute hnenah thahnem ngai taka sawipui a tum thu a tarlang a. Deputy Commissioner- in a kalpui bik hna hrang hrangah erawh duhsak a tum tih a sawi. Khawtlangin an mamawh tak Aadhar Enrollment- ah chuan internet tha tak a awm a nih chuan kar leh lamah Enrollment- ti turte tirh a tum thu a sawi bawk. Sawrkarin Awareness leh Training program -a kalpui thinte chu mipuiten chiang zawka an hriat theihnan hmalak a tum thu a sawi a. A bik takin PMEGP hnuaia loan lak dan chu khawtlang mipuiten an hlawkpui a beisei tih sawiin, Awareness mumal zawk nei tura hmalak a ni ang a ti.

Pu Lalhmunsanga Hnamte chuan Chheihlu khua a sawrkarin hmalakna a lo neih tawh ang angte chu uluk leh duat taka lo enkawl turin a chah a. Neitu thinlung put a nih loh chuan sawrkar hmalakna a thuanawp fo tih sawiin, duhsak tlak taka lo awm zel turin a ngen a. Chheihlu khawtlang mipuite chu khaw dangte entawn leh fak tlaka tan lo la zel turin a chah.

Pu Viasai Solo, E.E PHED pawhin thutawi sawina neiin In tina tui thianghlim pek a nih theih nan JJM kalpui a ni a, Chheihlu khua ngeiah pawh kalpui a ni a, khawtlangin in chhawr tangkai hle ka beisei a ni, a ti. Tun dinhmunah duh khawp lohna a awm a nih pawhin Project dangte pawh siam leh zel a ni ang a, tha leh changtlung zawkin hmalak zel a ni dawn a ti. Chheihlu mipuite chu an harsatna leh mamawhte lo thlen zel turin a chah a, a theihna chinah tanpui a tum thu a sawi. JJM chu Centrel Scheme - a nih ang takin endiktu an lo kal leh dawn a, tha taka JJM hnuaia hnathawhte in lo enkawl chuan hamthatna tamzawk Chheihlu khuain in dawn theih dawn avangin, Pipe line -te pawh tha taka lo enkawl chhunzawm zel turin a chah a ni.

Chheihlu Community Centre- a inkawmna leh tukthuan eiho zawh hian Tliatlu tlang pan nghal a ni a. Pu Lalhmunsanga Hnamte chuan lawm tak leh tangkai taka hman a nih theih nan Tiatlu panna kawng lungphun chu lawm takin a phun tih a sawi a. MTP Branch, Chheihlu ten thahnem ngai taka he tlang an lo humhalh tlat chu fakawm tiin an entawntlak hle a ni, a ti. Tliatlu Tlang panna kawng siam pawh tul hle nia a hriat thu sawiin, ramngaw, thing leh mau, nungchate chenna tih chereu erawh a hlauhawm hle a ti. Environment- humhalh chu khawvel inelna pakhat a nih avaning hmasawnna ruhrel dinte nen in nekbuai lo tura hmalak a tul a ti. Thasiama se no neihna - pawh step leh a vawnchhan dah a nih avangin a ropuina a tihniam nasa hle tiin, fimkhur a ngai a ti a. Thing leh mau, nungchate tichereu lo zawnga hnathawh erawh a tul hle a ti. Chheihlu khaw mipuiten an mamawhna a hriat thiampui tih tarlangin Pu Lalhmunsanga Hnamte chuan Tiatlu tlang panna tur kawng siamna tur sum leh pai an hmuh theih nan a theih ang anga hmalak a tum thu a sawi. Mizoram sawrkar hnuai emaw sawrkar laipui atanga tanpuina sum an hmuh ngei theihna turin theihtawp a chhuahpui dawn tih a sawi bawk.