2162/2024-2025

Aizawl, the 21st September, 2024: Public Works Department (PWD) Minister Pu Vanlalhlana leh Food, Civil Supplies & Consumer Affairs (FCS&CA) Minister Pu B. Lalchhanzova te chuan vawiin khan tunhnai ruahtui tla nasa avanga National Highway 06 (NH 06) Kawnpui leh Khamrang inkar kawng chhia thawmthat hna thawh mek tlawhin hmalaknate an enfiah. 

Pu Vanlalhlana chuan NH 06 kawng thawmthat hna theihtawp chhuaha kalpui a ni leh Nilainia enfiahna atanga hmasawnna tam tak hmuh a ni chu lawmawm a tih thu sawiin, thawktute chu tha thlah lova hma la zel turin a chah a. Kumin ruahtui tla tamin Mizoram hmun hrang hrangah harsatna a thlen thu leh hriat theih chinah leiminin hmun 573 aia tam mahah kawng a hnawh pin thu a sawi a. Mizoram ei leh bar lakluhna kawng pawimawh tak Silchar pawhtu kawngpui pawhin fur ruahtui nasa avangin harsatna namenlo a tawk tih sawiin, kawngpui chhia avanga nunphung khaihlak sukiang tura Sawrkar hmalakna thlawpa thahnemngai taka tawiawmtu YMA, NGO pawl hrang hrangte leh khawtlang hruaitute hmalakna fakawm a tih thu a sawi a. District Administration, PWD leh Police-te hmalakna leh nitin mamawh chak lakluh dan tur ngaihventu Supply Minister inpekna fakawm a tih thu a sawi bawk.

Food, Civil Supplies & Consumer Affairs Minister Pu B. Lalchhanzova chuan tun dinhmunah Aizawl pana tank lorry-te an lokal mek thu leh Silchar lamah pawh an dawh mek thu a sawi a. Vawiin tlai leh naktuk lamahte khuain a bumrote a nih loh chuan oil leh nitin mamawh phur dangte a rawn thlen belh zel beisei a nih thu a sawi bawk.

He hunah hian kawng thawmthat hna kalpui meka hmasawnna thlen chinte ngun taka ngaihtuah a nih hnuin vawiin tlai dar 5:30 atangin nitin mamawh bungrua (essential commodities) phur lirtheite chu kaltlang tir an ni tawh dawn a. Hetih rual hian kawngpui vilzui leh thawmthat hna pawh boruak awm dante thlir reng chunga thawh zel tum a ni.

Tunkar Nilaini September ni 18, 2024 khan PWD Minister leh Deputy Speaker-te chuan he kawng hi zawhin hmalaknate an lo enfiah tawh a; hemi ni hian ruahmanna thar siam niin lirthei tangkhangte chhuah tir an ni a. Ngawrh zawka kawng siam a nih theih nan lirthei paltlang turte dang betin a tuk Ningani September ni 19, 2024 atanga vawiin Inrinni September ni 21, 2024 thlengin kawng thawmthat hna PWD in team 4 ah inthenin JCB 5, Excavator 1, Road Roller 4 leh hlawhfa tam zawk ruaiin a siam a. Nizan atang khan lirthei Silchar lam pan turte chhuah an ni a, vawiin tlai atangin Aizawl pan bungraw phur lirtheite chhuah chhoh a ni ang. 

He huna tarlan a nih danin NH 06 Kawnpui-Khamrang Section huamchhung Km 122-123 inkarah kawng thawmthat ngai zual 2-3 vel awmin, Km 124-126 inkarah 5-6 leh Km 129-132 inkarah 4-5 vel awmin a zualpui zawhfel tawh a ni a; ngun taka vilzui zel a ni dawn a, lirthei tana zawh harsa laite pawh a tul anga thawm that zel tum a ni.

NH 06 Kawnpui-Khamrang Section hi Sadguru Engineers & Allied Services Pvt.Ltd-te siam niin, nakum May thla thenga enkawl chhunzawm tura tih an nih laiin an enkawl zui that loh avangin PWD in an tihtawp sak a, an pawisa dahkham cheng nuai 35.37 hmangin PWD in cheithat hna an thawk mek a; hei hian a siamthatna a daih dawn loh avangin a thawh chhunzawmna tur Sawrkarah dil belh mek a ni.

NH 06 hi Sawrkar laipui Ministry of Road Transport and Highways (MoRTH) kawng niin, four lane a siam turin NHIDCL kuta dah a ni a, DPR siama tender chhuah niin contractor pawh thlan fel a ni a, compensation chungchangah forest ram leh mimal ram inthuah a awm avangin hna tan theih a la ni rih lo a ni. Sadguru Engineers & Allied Services Pvt.Ltd kawng siam NH 06 Kawnpui-Khamrang inkar hi defect liability period chhunga la awm a nih avangin PWD kut atangin NHIDCL chuan an la chhawng thei rih lo a, PWD in an enkawl hnuah theihtawp chhuaha cheithat mek zel a ni a, NHIDCL kuta hlan thuai tum a ni. Hemi hnu hian a enkawl zui hna NHIDCL in an tum tawh ang.  NH 06 Khamrang-Sairang Section bik hi NHIDCL kutah hlan fel tawh niin an hnuaia company-in a enkawl mek a ni.  

PWD Minister leh Supply Minister-te hian kawngpui siamthat hna thawka Sawrkar hmalak mekna tawiawma an khaw huamchhunga hnatlang Khamrang Branch YMA te pawh tlawhin an hmalakna avangin lawmthu an sawi a; hnatlangte thingpui inna tur sumfai an hlan a ni.

Minister-te hi Er. H. Zoramliana, CE (Highways); Er. Robin Lalrinawma, SE (National Highway Circle-I); Er. R. Lalduhthlanga, Sr. EE, National Highway Division-III leh Official dangte'n an tawiawm a ni.