1466/2024-2025
Aizawl, 6.8.2024: PWD Minister Pu Vanlalhlana chuan fur ruahtui tlain chhiatna a thlen leh PWD hmalakna chungchangah a hnuai ami ang hian thuchhuah a siam:
"Kan hriat theuh angin kumin hian kum dang zawng aiin India ram pumah fur ruahtui a tla tamin, State tin deuhthawin kan tuar nasa hle a. Mizoram pawhin tun hnai kum dang zawng aiin kan tuar nasa niin a lang. Hmun tam takah lei a min avangin kawngpuite leiminin a hnawh a, kawng thenkhat phei chu a bung/chhum hmawk hlawm a. Hmun thenkhatah phei chuan in leh lo chhe ta vek te, nunna chan hial te an awm a, a pawi takzet a ni.
"Hetianga khuarel chhiatna a lo thlen hian PWD chu a tuar nasa ber pawl Department kan ni ziah a. Tun tum chhiatna ah pawh hian kan kawng enkawlte him aram a awm lo tluk a ni a. May ni 28-a Cyclone Remal-in min chhut atang khan kan kawngin chhiatna a tawk zawn chho mawlh mawlh mai a. Kawng thenkhat chu metre 100 dan lek leka ping tlat te awmin kawng thenkhat phei chu a kawng chhuat bal nasa tak te, bal hlawk (a thara kawng sial ngai) te kan nei a. Heng chhiatna hrang hrang thawmtha (restore) tura PWD-a ka thawhpuite – a te ber atanga a hotu lian ber thlenga theihtawp an chhuahnaah lawmthu ka sawi a. Zing hma tak atanga che chhuakin zan thim thleng thlengin rim takin an thawk a, Pathianni leh office chawlh pawh sawi thei lovin an thawk tang tang mai han hmuh leh hriatte hian min tilawm takzet zet a ni. PWD enkawl kawng nilo ah te pawh sawrkar leh mipui ngenna avangin an thawk hial a ni.
"Tin, kan sum dinhmun hi a that lutuk loh avangin sawrkar tan pawh a luhaithlak takzet a. PWD-in kan enkawl lai kawngte pawh duh angin kan cheihnum thei hrih lo tih min hriatpui turin Zoram mipuite ka ngen duh a. Tunah hian leimin thenna ringawt pawh mi tam tak hnenah a vaibelchhe tel tehmeuh leiba kan nei a. Kan khawl hire-na te pawh dawhthei taka min lo nghak turin ka ngen a, Central leh State sawrkara Finance lam enkawltute pawh a bik taka kan harsatna min ngaihtuahsak turin ka ngen nghal bawk a ni. Kawngpui hmangtu mipuite pawh hna thawktute zai ngai a, zawldawh taka leimin thiantute tawiawm a, kawng tlang hun dawhthei taka nghak hram hram turin ka ngen a ni. Tin, leimin then hi zan thim, kawng chung lam atanga lung lo lum thei leh thing lo tlu thei hmu chiang lo chuan a hna hi nunna chan hial pawh awm theih a ni a. Tunhma pawhin leimin then laia chesual nunna chan pawh kan lo nei nual tawh a ni. Hetiang taka fimkhur ngai a nih avang hian experience lo ngah tawh zawk Officer-te chuan a theih hram chuan zan thim hnuaia thawk lo turin field lama hna thawktute pawh an chah hlawm a, nunna chan leh hliampui tuar kan awm lo niin ka hria a, Pathian vennaah kan zavaia lawmthu sawi hi kan tih ngei pawh a tha awm e.
"Engpawh nise, fur a la zo lova, kan cho reng vang nilovin chhiatna hrang hrang pawh lo thleng leh thei a ni a, PWD-a ka thawhpui zawng zawngte fimkhur tak leh Pathian venna leh enkawlna dil zel chungin taima leh thahnem ngai taka ram tana thawk turin ka ngen a, hetianga thawk thei tura hriselna nei turin duhsakna ka hlan bawk e. Tin, hmun hrang hranga PWD hna thawktute lo tawiawm a, ei leh in turte lo buatsaih saktu LC/VC/YMA/MHIP te hnenah thinlung takin lawmthu ka sawi bawk a ni."
