1467/2024-2025

Aizawl the 6th August, 2024 : Vawiin khan School Education Minister Dr. Vanlalthlana'n Govt. Mizo High School Multipurpose Hall-ah 'ULLAS Mela & Mizoram Samagra Shiksha Exhibition 2024' ni hnih awh tur a hawng. Exhibition hian August 7, 2024 thleng a awh dawn a ni.

Khuallian Dr. Vanlalthlana chuan thusawiin Samagra Shiksha hmalakna avang hian zirna hi a kal ṭawk ṭawk a, an hmalakna hi a pawimawh hle a ni a ti a. Mizoramah hian zirnain hma a sawn loh chuan khawtlangah zan mut theih loh khawpa buaina te, chhungkaw buaina te a awm țhin a, khawtlang leh chhungkua hahdamna hi kan tuak chhuah a ngai a, chumi atan chuan zirtirtute leh officer te ṭanho a ngai a, kan hma zawna thil tih tur awmah theihtawp kan chhuah chuan mitin hahdamna hi kan tuak chhuak thei dawn a ni a ti. Zirna kawngah ngaihdan leh rawtna nei tan chuan hrilh ṭhin turin a chah a, ngaihdan neite chu inthlahrung lo turin a sawm. Naupangho hian thawktute bak hi nghahfak dang an nei lo tih sawiin sikul naupang han hmuh hian min chotuah ṭang se a duh thu a sawi bawk.

Minister hian NIPUN Bharat theme song competition-a lawmman late certificate leh ULLAS certificate a sem nghal bawk.

ULLAS MELA leh Samagra Shiksha Exhibition hi Pu David Lalthantluanga, Special Secretary School Education-in a kaihruai a, Pu Lalsangliana, State Project Director-in keynote address a sawi a. SPD chuan ULLAS-in a tum chu mi zawng zawngin ziak leh chhiar an thiam theihna atana hmalak a ni a; Mizoram sorkarin zaah za ziak leh chhiar thei tura ṭan a lakna a ni a ti.

Samagra Exhibition-ah hian Stall hrang hrang 22 siam a ni a, heng stall-ah te hian ULLAS chungchang leh Mizoram zirlaite tana Samagra Shiksha hnathawh chi hrang hrang phochhuah a ni a, Samagra Shiksha hnathawh mai bakah MBSE, SCERT leh PM Poshan hnathawh leh hmalaknate phochhuah a ni bawk. Samagra Shiksha hnathawh zingah hian Sports & Physical Education, Skill Education, Inclusive Education, Civil works, Community Mobilisation, Kala Utsav, Rangotsav, Band Academy, Gender & Equity, Vidhyanjali, ULLAS, PM SHRI, Foundational Literacy and Numeracy(FLN, NIPUN Bharat leh Media cell hnathawh te entir a ni a. Heng an hnathawh chi hrang hrang an phochhuah te hi ziaka sawifiahna an sem tel zel bawk.

ULLAS MELA leh Samagra Shiksha Exhibition hawnnaah hian School Education Secretariat leh Directorate officer te, SCERT leh MBSE officer te, zirtirtu leh zirlai țhahnem tak an tel a ni.