Vawiin chawhnu khan Engineer-in-Chief PWD Conference Hall, Tuikhuahtlang-ah Public Works Department (PWD) Minister Pu Lal Thanzara hovin Review meeting neih a ni a. Meeting hi Principal Secretary, Pu Lalram Thanga IFS-in a kaihruai a ni.

Pu Lal Thanzara chuan kum dang ang lo takin March thla atang khan lo hal hun pawh bi thliah hlei thei lovin ruah surin min tibuai nasa a ni tiin hei vang hian kalpawhna kawngpui pawh kum dang aiin a chhiat nasat bakah leimin pawh a tam phah a ni,a ti a. Kawng chhia vangin khualzin zan hnih thum kawng laka tang sawi tur awm lo leh leiminna hmun rang taka tihfel (clear) nghal anih chungchangah department hnathawh chu chhuanawm a tih thu a sawi a. Kawng siamna atan khawl hrang hrang mamawh  -  Mini Hot Mix Plant, Road Roller leh Motor lei anih tawh thu a tarlang a. Kawng chhelai siamthat hna tih tak zeta thawk turin leh hma la turin kalkhawmte chu a chah a. Work site tlawh leh inspection uar turin a fuih bawk a. Kalkhawmte hnenah chuan harsatna kan tawh atang hian inenlet nachang hriat a tul a ni,a ti. 

Minister chuan department hmalaknate chak zawka kalpui a nih theih nan rawtna nei tan a in hawn thu a sawi a. Department hmalakna mipuite hriat tura puan zar kawngah tan lak a ngaih bakah social media hman fimkhur a ngai a ni, a ti a. Sawrkar laipui duh danin Mizoram State Road Fund Act siam anih tawh thu tarlangin he Act hi tun hnaiah siamthat niin Mizoram Road Fund Board pawh din anih tawh thu a sawi a. Minister chuan engineer kalkhawmte hnenah chuan an bial theuhah mipui leh tlawmngaipawl thawhpuia sawm turin a chah a. Hei hian mipui ten neitu nihna tak tak neihna kawngah a pui dawn a ni, a ti a. Hnathawk tha chu chhinchhiah niin duhsak an hlawh tur thu a sawi a. An mawhphurhna ah theihtawp chhuah turin kalkhawmte chu a sawm bawk a ni.

Principal Adviser to Chief Minister, Pu R. Lalrinawma IRS (Rtd.) pawhin thu sawiin kawng laihna atana ram lak (acquisition)-ah fimkhur a tul a ni, a ti a. Department dang thawhpui thiam a pawimawh a ni tiin ram lak chin chhinchhiah that a tul a ni, a ti a. Maintenance Policy tha kan neih hi ngai pawimawhin mipuite hnena kan puanzar a ngai a ni, a ti.

Meeting-ah hian PWD kawng enkawl siamthat mek leh hmalak dan tur sawi ho a ni a. Chief Engineer (Roads), Chief Engineer (Highways) leh Chief Engineer (Buildings) ten an hnuaia hnathawh leh thawh tura hmachhawpte an tarlang a. Hemi chungchangah hian sawihona neih a ni a. Public Works Department (PWD) hnathawh dan leh sum ruahman sawiho a ni bawk a. Meeting-ah hian PWD hotute leh divisional officers zawng zawng an tel a ni.

Tun dinhmunah hian PWD hnuaiah kawng enkawl mek 6127.81 kms a awm a. Heng hi National Highway 1465.12 kms niin State Roads 4662.69 kms a ni.