Vawiin chawhnu khan PWD  Minister Pu Lal Thanzara chuan North Eastern  Council(NEC) sum Rs. 475.28 lakh senga sak, mipui punkhawmna, contact sports leh indoor games chi hrang hrang khelh theihna hmun, Chanmari West Community Hall chu a mamawhtu apiangte hman theih turin a hawng.

PWD Minister Pu Lal Thanzara, Bialtu MLA ni bawk chuan Chanmari West Veng in Hall tha tak mai an nei ta chu  a lawmpui tih a sawi a. Pawl leh Khawtlang  thil reng reng, public property-te hi mahni ta anga enkawl thiam chu khua leh tui tha tih dan tur ani a ti a. Sporting Club leh YMA-te, NGO hrang hrangte pawhin vengchhung hmasawnna an ngaituah rualin mi chanhai leh harsa zawkte enkawl leh tanpui kawngah te pawh mawh kan nei tih kan hriat tel reng a ngai bawk  a ni a ti.

"Kan sorkarin thalaite khawvel thar siam a tiam chu a takin a kalpui zel a, Mizoram hmun hrang hrangah sports infrastructure tha a din tawh a. Thalai sang tam takin an chhawr tangkai mai nilovin football lamah phei chuan eizawnna tling khawpin kan thalai ten hma an sawn a. Heng sports lamah ruhrel tha Sorkarin a buatsaih te hi thalai tam zawk tan chona ni se. Sorkar chuan a tih tur a ti a, infiamna lamah in kal anih chuan thalai te hi, tih tak zeta theihtawp in chhuah ka duh a. Hemi atan hian kan sawi thin angin, mahni inthunun hi a pawimawh ber a, chumi atan chuan kawng engkimah kan nun kan uluk leh kan fimkhur a tul a ni", a ti. 

Khawtlang mipuite puipunna hmuna a sawifo thin chu “Ruihhlo - Drugs” chung changa tanlak tlan a ngaih thu a ni tih a sawi a. "YMA leh NGO hrang hrang ten nasa taka kan do mek chung hian, min chenchilh reng thova, kan thalaipui tam tak kan chan tawhin, a buaipuitu pawh kan thalaite atangin an la awm reng tho a. Heng ruihhlote hi a “luh-ka” leh a “chhuah-ka” nih kan ram hian a fawmkem tlat avang hian, khawvel awm chhung chu kan inchiah-piah dawn ni pawhin a hriat theih ani. Chuvangin, tun aia nasa leh zual a, damdawi hlauhawm leh, Thalaite mit la tak mai chi lo chhuak thar zelte hi, Sorkar, Kohhran leh NGO anga THAPUI thawh a kan do chhunzawm zel hi a tul ta tak zet a ni", a ti.

Thusawitu dang, Pu C. Laltlanthanga, Secretary, Mizoram State Sports Council chuan Vantlang tana infrastructure,  sawrkarin a din te chu a veng neitu ten neitu chan an chan thiam bakah a enkawltu nihna an chan tel a ngai a.  Veng danga atanga rawn pantute tan pawha kan inhawn tlan theuh a ngai a ni a ti a. A pawimawh ber chu naupang zawkte,  nakin lawka state leh ram ai la awh thei turte chherchhuahna leh training na hmun atan te hman kan phal a ngai a ni a ti.

Chanmari West Community Hall hawnna inkhawm hi Chanmari West Sporting Club Chairman Pu Lalbiakhluan a kaihruai. Technical Report Sr. EE Pu Lalthanzuala Ralte, Project Division - II, PWD hnen atangin ngaihthlak a ni. Technical Report a tarlan dan chuan Chanmari West Community Hall hi chhawng 5 a sang a ni a. Dt 17.01.2017 ah sak tanin kumin August thla khan sak zawh a ni. A chhawng tina chhuat zau zawngte belhkhawm chu Square Metre 1459.54 a ni. Chanmari West Community Hall buiding chhungah hian mipui punkhawmna tur hmun te, Indoor Sports leh contact sports discipline hrang hrang khelh theihna hmun te, main indoor stadium - badminton court pahnih awmna te, Lirthei dahna - Garage, Chowkidar In te, Litre 68000 lenna tuizem leh office te a awm a ni. Chanmari West Community Hall hi Chanmari West Khawtlang tan bakah a mamawh a piangte hman tura ruahhman a ni.