NLUP hmuaia hmalakna thar "Rain Garden & Mei Sipai Scheme" leh "Chief Minister's Special Package (Medical Care)" chu vawiin khan Chief Minister Pu Lal Thanhawla chuan a tlangzarh. He programme, Lal Thanhawla Auditorium-a neih hi Pu J.H.Rothuama, NLUP Implementing Board Chairman chuan a kaihruai a, Dy. Chief Whip Pu R.L Pianmawia pawh he hunah hian a tel a ni.

Chief Minister chuan sawrkar hruaitute chuan ramin a mamawh ang zela an hriat angin policy siam a nih thin thu a sawi a. Rambuai laiin mipuiin remna an neih theih nan hmalak a ni a, chumi hnu ah rambuai avanga khawsak harsa te rahbi tuk sakna turin hmalak leh niin, vawiin thleng hian mi harsa rahbi tleu ten eizawnna ngelnghet an neih theih nan NLUP kaltlanga hmalak zel a nih thu a sawi a. NLUP hnuaiah chuan tunlaia ramin a mamawh - state hmasawn zel nan a inenkawlna lama chhawmdawlna "medical care" mi harsa zualte tana buatsaih leh, ramngaw leh nungcha humhalh kawnga hmalakna thar NLUP kaltlanga siam a ni chu Chief Minister chuan lawmawm a ti a. 'Kumtin a India rama kawngmei chhuah tamna ber zing a mi kan ni mai hi a zahthlak a, kangmei vennna kawnga hmalaknate hi kan zavai tan a ni tih hriain mitin kan tan tlang a ngai a ni', a ti. Pu Lal Thanhawla chuan CM's Special Package hnuaia Medical Care dah thar a ni chuan a mamawhten tangkai taka an hman a beisei thu a sawi a. Ramin hma a sawn dawn chuan a chhunga cheng thawktu mipui an hrisel a ngai a, hrisel tur chuan kan phak tawk theuh ah kan in uluk a, ei leh inah kan fimkhur a, zuk leh hmuam laka kan fihlim tlan a pawimawh tel em em a ni, a ti.

NLUP hnuaia program thar tlangzarhna inkhawmah hian Chairman Pu J.H. Rothuama chuan Medical Care hmalakna chuan hospital hrang hrangah poor fund leh thawktuten an mimal pawisa te hmanga mi harsa an inenkawlna bill pe theilote an lo puih thin tawh chu a phuhruk theih a beisei thu a sawi. Pu P.L Thanga IAS (Rtd.) Member Secretary, State Planning Board & Vice Chairman, NIB chuan heng scheme thar kalphung leh a chungchang hriattur pawimawh hrang hrangte a sawi a. NLUP hnuaia "livelihood project" chu zawh fel thawkhat a nih thu leh, tunah hian NLUP thiltum dangte tihlawhtling tura heng project te hi kalpui leh tur a nih thu a sawi. Minister leh khual pawimawh dangten CM's Special Package (Medical Care) chu hospital thlan te hnenah sem bawk a ni a. Vawiin hi "International Day of Older Persons" a nih angin programme hmang tura kalkhawmte zinga kum 80 tling tawh mi panga hnenah MEFCOF Patron Pi Lal Riliani chuan lawmpuina a hlan bawk. MEFCOF leh CYMA chu  ramngaw leh nungcha humhalh te, tuihna humhalh leh kangmei do hna an din avangin lawmpuina citation leh pawisafai cheng singkhat ve ve pek an ni bawk. Secretary Pu James Lalrinchhana chuan lawmthu sawiin inkhawm hi a khar a ni.

Sawrkar laipui bultum Health Care Scheme (RSBY, PMJAY) leh State Health Care Schene hnuaia in register ve lo mi harsa leh chhumchhiaten enkawl a an dawn theih nan District Hospital zawng zawng te, Medical College Hospital te leh private hospital pawimawh zual, hemi atana thlan bikte tan Chief Minister Special Scheme (Medical Care) hi ruahman a ni. Beneficiary atana thlan theihte chu mirethei chhumchhia leh engmah nihna leh chanvo (identity & entitlement) nei lo, Sawrkar emaw, Organization/Company emaw a hnathawk lo, chhungte nghenchhan tur sawrkar emaw organization rintlak deuh emawa hnathawk awm lo, sum hnar dang mumal innghahna pawh nei lo, damlohna avanga damdawiinah inenkawl tura lo kalte tan a ni a. Beneficiary-te chu Mizoram chhunga cheng, voter's ID nei ngei tur an ni a. Naupang vote la nei thei lote an nih chuan an nu emaw pa emaw voter’s ID hman theih a ni ang. Aadhar Card neite tan Mizoram  chhung mi dik tak fiahna a awm chuan hman theih a ni bawk ang.

He CM's Medical Care Scheme kalpuina atan hian heng Damdawi In - Aizawl Civil Hospital; Medical College Hospital, (Referral Hospital), Falkawn; District Hospital 8 te leh Cancer Hospital, Zemabawk, Aizawl; Synod Hospital, Durtlang; Aizawl Adventist Hospital Aizawl; Christian Hospital, Serkawn; Lairam Christian Medical Centre & Hospital, Lawngtlai, leh Christian Hospital (BCM), Lawngtlai te thlan an ni.

CM Special Scheme-a sum hman tur hi Medical Superintendent te account-ah dah luh a ni ang a. Medical Superintendent hian CM Special Scheme Management Committee din in he sum hi beneficiary te tan an hmang thei ang. He Committee hian Beneficiary an thlang ang a, a tul ang leh an mamawh angin pek tur (assistance amount) zat an tuk ang. Tanpuina dawngtute list leh an dawn zat tha takin an vawng ang a, a tul ang zela audit theih turin an buatsaih ang. Sum kal vel dan an endik ang a, mamawh dan ang zelin dil belhna (demand) te NIB-ah an thlen thin dawn a ni. Tum khatah Rs. 20,000 (twenty thousand) hi upper limit a ni ang a, hei aia tam mi pakhat tana hman a tul a nih chuan a enkawltu doctor emaw ward sister lehkha (MS hriatpuina) nen chairman NIB phalna lak tur a ni. 

Rain Garden leh Mei Sipai scheme te hi NLUP thil tum - ram leilung hman dan tur ruahmanna thar leh ram ngaw siam thatna atana duanchhuah a ni a. Rain Garden Scheme hnuaiah hian tuikhur tui leh lui tui tih nun thar lehna atan lui hnar leh tuikhur hnar ‘catchment area', 2,100 Sq. Km. area vel, a bika humhalh turin tuikhur hnar leh lui hnar area zawng zawng hi a bika humhalh a, ram ngaw reserve nghet siam a, vantlang ram - mimal leh pawl ten mahni duhthu a khawih chhiat leh tihdanglam theihloh turin, khaw tinah Committee siam a, vawnhim tur a ni. Mizoram van ruah kum tin a 2,300 mm aia tam mah a thlawna kan dawn hmang tangkai a, van ruahtui hmanga ram ngaw siam thatnate, lei hnawnna siam thatnate, lei chhung lam tui (underground water) hman tangkainate leh heng hmanga tuikhur tui tihpun leh te, lui hnar leh lui kam humhalhna hmanga lui tihnun thar leh na a huam hawk.

Kum tina ram kang in ngaw a tih chhiat nasat avangin, kangmei laka ram ngaw humhalhna atan khaw tinah ‘Mei Sipai' dah a ni ang a, Mei Sipai te hian khaw tina ram ngaw humhalhtu Committee leh khawtlang thuneitute kaihhruainain ram kang laka ram ngaw humhalhna atan a mawh an phur dawn a ni. Ramngaw leh nungcha humhalh lama tlawmngai pawl MEFCOF te chuan Durtlang ram humhalhna leh khaw thenkhatah Mei Sipai hi hlawhtling takin an lo hmang tawh a. MEFCOF tawnhriat atangin Mizoram khua zawng zawngah hman nise tia ruahmanna siam a ni a.