3548/2023-2024

Dated Serchhip, the 29^th January, 2024: Vawiin khan PWD Minister Pu Vanlalhlana chuan Aizawl-Thenzawl-Lunglei (ATL) kawngpui siam leh cheithat hnathawh mek chu a hmunah tlawhin a enfiah a. Lunglei High Powered Committee Vice Chairman Pu V Malsawmtluanga leh Lunglei West bialtu MLA Pu Lalhlimpuia ten Minister hi an tawiawm a ni.

PWD Minister chuan thawktute uluk taka kawng siam hna thawk turin a hrilh a. Inkalpawhna kawng tha siam hi sawrkar chuan a ngai pawimawh hle a, an kawng siam quality a tha tawk em tih chu thuneituten an vil reng dawn tih hrilhin kawng tha leh tlo, hun rei tak daih thei tura tha siam ngei turin Pu Vanlalhlana chuan contractor te a hrilh a ni.

Aizawl-Thenzawl-Lunglei kawngpui siam leh cheithat hna hi SASCI II sum hmanga thawh a ni a. PWD hnuaiah Hmuifang Division leh Lunglei Division ten an vil a. Hmuifang Division chanpual lamah hian Defect Liability Period ina a la huam chin 71-83kms a thui kawngpui thawm that hna thawh a ni a, SASCI II sum cheng vaibelchhe 13.22 hmangin ATL road  chainage 83-100kms a thui kawngpui cheithat hna thawh a ni bawk.

Lunglei Division chanpual lamah hian SASCI II hnuaiah kawngpui chei that hna hi hlawm hnih a then niin contractor pahnihin an thawk a. Hlawm khatna hi chainage kilometre 120-130 niin cheng vaibelchhe 6.58 hmanga siam a ni a.  Hlawm hnihna hi chainage kilometre 100-120kms a thui a ni a, cheng vaibelchhe 6.47 senga siam a ni thung.

Vawiin hian PWD Minister hi PWD Chief Engineer Pu David Sapzova bakah Hmuifang leh Lunglei Division hnuaia Superintending Engineer leh Executive Engineer ten an tawiawm a ni.