2110/2024-2025

Aizawl, the 18th September, 2024: Public Works Department (PWD) Minister Pu Vanlalhlana chuan vawiin khan tunhnai ruahtui tla nasa avanga National Highway (NH) 06, Kawnpui leh Khamrang inkar kawng chhia chu a hmunah tlawhin hmalakna kal mek a enfiah bakah hmachhawpte Official leh hemi kaihhnawih lirtheia eizawngte a sawipui. Heng bakah hian Kawnpui quarry bul leh Sethawn RTP peng bula NHIDCL kawng siam avanga harsatna thlengte a enfiah nghal bawk. PWD Minister hi Dy. Speaker Pu Lalfamkima'n a tawiawm a ni.

PWD Minister Pu Vanlalhlana chuan NH 06 chu Mizoram chak lakna kawngpui pawimawh tak a nih avangin kawng chhiate hmanraw neih ang ang pawt khawma theihtawp chhuaha buaipui a nih thu a sawi a. PWD hotute chu hmalaknate uluk taka vil reng tura chahin, hemiin a nghawng hrang hrangte pawh kawngpui tha nei tura Sawrkar hmalaknate thlawp tlat turin a sawm a. Kawng chhiate a ranglama thawmthat thuai tum a nih thu sawiin, kawng siam leh thawmthat hna thawh a nih chhung hian harsatna tawk palh an awm pawhin kan zavaia tana tha tur a ni tih hriaa lo hrethiam hram hram turin a ngen a ni.

He huna thurel bawhzuiin NH 06 Khamrang leh Kawnpui inkar kawng chhiate chak zawka siamthat a nih theih nan lirthei tangkhang mekte chu vawiina chhuah tir vek hman tura hmalak nghal a ni a. Naktuk atangin ni thum chhung lirthei eng chi mah tlan tlang tir lovin ngawrh lehzuala kawng siam hna thawh nise tih a ni a. Hemi atan hian PWD lamin tuna an hman mekte bakah kawng siamna hmanrua leh thawktu tam zawk a ngaihtuah belh nghal a. Hemi hnua harsatna a awm a nih chuan ruahmanna thar siam leh nise tih a ni. Heng bakah hian kawng siam nana pawimawh lungchang leh POL te a thlen zung zung theih dan turte, lirthei veivakte awmze nei zawka buaipui dan turte pawh sawiho a ni a. NHIDCL enkawl kawngpuia harsatna thlengte chu a tul angte bawhzui thuai tura hriattir nise tih a ni bawk.

PWD Minister leh Dy. Speaker-te hi Er. H. Zoramliana, CE (Highways), PWD; Er. R. Lalduhthlanga, Sr. EE, National Highway Division-III, SI Zorammawii, OC, Kawnpui PS; Mizoram Truck Owners Association, Mizoram Truck Drivers Association leh Kolasib Truck Owners Association hotute'n an tawiawm a ni.