North Eastern Council bultuma sak zawhfel tak Electric Veng YMA Indoor Stadium chu vawiin khan PWD, etc Minister leh Bialtu MLA ni bawk Pu Lal Thanzara’n a hawng a; he hunah hian Pu KH Siile Anthony, Director, HRD&E, NEC chu Khualzawm niin a rawn tel a ni.

Indoor Stadium hawnna inkhawm Sports & Youth Services Director Pu Zothanmawia kaihhruaiah Khuallian Pu Lal Thanzara chuan Electric Veng YMA member zawng zawngte YMA Day chibai bukin he Indoor Stadium sak puitlin nana Electric Veng mipuite tanrualna leh tumruhna a fak bawk. A bial chhungah Aizawl mipuite hman tangkai tura Indoor Stadium tha tak sak a nih theih avangin Sports Minister Zodintluanga bakah Mizoram State Sports Council leh Sports Department hotute chungah an duhsaknaah lawmthu a sawi a. Sorkarin thalaite hmakhua ngaiin nasa takin an hmasawnna turin hmalakna hrang hrang a nei mek a; chumi rah duhawm tak chu Mizo thalaiten an chhawr zel a, khawvel hriat khawpin sports disipline hrang hrangah hming chherin, Football bikah phei chuan FIFA beng thleng hial khawpin Mizo footballer-te chuan hming an chher tawh a ni, a ti. Mizo infiammiten state leh ram pawn inelna hrang hrangah telin medal an rawn hawn a, Sports lama hotute pawhin heng infiammi hlawhtling taka lo hawte lo hmuaka chawimawina leh lawmpuina buatsaih sak hi hna ber pakhatah a ni hial tawh a ni, a ti bawk. Chu bakah Mizo thlaite engemawzat chu hospitality service hrang hrang leh airways cabin crew-ah te hna an hmu zel a, zai-rimawi khawvelah engemawzatin hmingthanna leh eizawnna ngelnghet tak an nei mek bawk a, chuvangin Mizo thalaite chu ruihlo leh ruihtheihthil dangte, zuk leh hmuam hawisan a, hmasawnna kawng tha zawk thlang turin a fuih. NEC duhsakna avangin Mizoramah project tam tak tihpuitlin zel a nih theih chu a lawmawm hle a ni tiin Pu Lal Thanzara chuan NEC aiawhin Pu Anthony a lo tel thei chu a chungah lawmthu a sawi bawk.

Indoor Stadium hawnna inkhawm zawhah PEW Minister hian Electric Veng YMA day lawmna a hmanpui nghal a. Mizorama thisen pe hnem ber (highest blood donor) Tv.Lalremruata, Electric Veng hnenah chawimawina leh lawmman a hlan nghal bawk a ni.

Khualzahawm Pu Pu KH Siile Anthony, Director, HRD&E, NEC pawhin thu sawiin hmarchhak state zingah Mizoram chuan NEC atangin project hrang hrang atan sum a hmu hnem ber a ni, a ti a. Hmun thenkhatah NEC sum bultuma sak building lian leh tha tak takte awm thin mahse mipuiin an chhawr tangkai thei loh thin avangin a ramin a chhe thuai thin a, chutiang karah sum indaihloh chungin Indoor Stadium changtlung tak Electric Veng YMA ten an sa thei chu an fakawmin an entawntlak hle a ni tiin Pu Anthony chuan NEC aiawhin lawmthu a sawi a ni.

Vawiina Mizoramah a cham chhungin YMA Day lawmna a hmanpui thei chu vanneih a intih thu leh YMA member zawng zawngte chu YMA Day Chibai leh duhsakna a hlan a ni.

Hawnna inkhawmah hian MSSC Vice-President Pu V.Lalzawmliana chuan Indoor Stadium neitu nihna chu Electric Veng YMA hnenah a hlan nghal a; EYMA Vice-President Pu C.Lalrokhuma’n lawmthu sawina neiin hun a khar a ni. Electric Veng YMA Indoor Stadium sakna tur hian kum 2012-2013 khan North eastern Council (NEC) atangin cheng nuai 493.63 hmuh a ni a. He hna thawk tur hian Pu F.Lalmalsawma, Tuikual ‘A’ Aizawl chu thlan niin June ni 16, 2013 khan hna thawh tan a ni a, June ni 1, 2018 khan tha taka zawh a ni. He Indoor Stadium hi chhawng li-a sak a ni a, hetiangin :

1. Ground Floor leh First Floor : Ground Floor hi 347.86 Sqm-a zau niin, 1st Floor hi 497.81 Sqm-a zau a ni a. Motor parking atana ruahman a ni a, hetah ian Car 32 leh two-wheeler 26 dah theih turah ngaih a ni.

2. Second Floor : Second Floor zau zawng hi 656.53 Sqm a ni a, hetah hian Table Tennis Hall, Gymnasium hall, Boxing Hall leh Shooting Gallery te awm thei turah ngaih a ni.

3. Third Floor : Indoor Stadium chung ber hi Multi-purpose Indoor Hall tura ruahman a ni a. A zau zawng chu 754.88 Sqm a ni. Hetah hian Basketball leh Volleyball khelh tura ruahman niin, mi 640 thut theihna tur Gallery siam tel a ni bawk. Playing Area level-ah hian inthiarna Mipa tan 4 leh hmeichhe tan 2 siam a ni a. Gallery level-ah hian mipa inthiarna 6 leh hmeichhe tan 2 dah a ni bawk.

Attachment

  • Loading attachment...