Vawiin chawhma khan Deputy Commissioner leh District Election Officer, Aizawl district hmalakna hnuaiah AR Ground ah “Awareness-cum-Training Programme for Persons with Disabilities (PwD) Voters and Newly Enrolled Voters” buatsaih a ni a, Pu H Lianzela, Joint Chief Electoral Officer, Mizoram chu khuallian niin Pu VL Hruaizela Khiangte, Deputy District Officer & Addl. Deputy Commissioner, Aizawl District in he hun hi a kaihruai a ni.

Khuallian Pu H Lianzela, Joint CEO chuan,” Mizoram a MLA election ah hian 80% vote aia sang a tla tlangpui a, MP election 2004 ah 63.36%, 2009 ah 50.93% leh 2014 ah 61.06% chauh a tla thung a ni,” a ti a,”Ram pum huapa inthlanna leh ram chhung rorelna inpui ber Parliament a kan aiawh tur thlannaah hian tan la ila, State dangte mak tih tur khawpin vote thlak vek i tum ang u” a ti bawk. Pu H Lianzela chuan,” Vote tla tha tur chuan PwD leh vote nei thar te hi kan pawimawh hle a, vote kan thlak theihna tur hian State level Steering Committee on Accessible Election chu CEO kaihhruiana hnuaiah din niin Polling station ah te pawh kan mamawh tur hrang hrang duan a ni tawh a ni,” a ti a,” Kum 18 kan tling tawh a nih chuan vote thlak hi kan chanvo nimai lovin, kan tih tur ani tih hria ila, kan aw kan chhuah ve na leh kan duhthlanna kan tihlan ve na kawng pawimawh tak a ni”, a ti bawk. Joint CEO chuan PwD voters leh Newly enrolled voters te chu vote thlak ngei tur a fuihin,”Kalphung diklova kan ngaihte kan siam that theihna chu vote thlak hi a ni a, kan vote hmang hian danglamna kan siam thei a ni,” a ti a,”vawiin a kan him nan, naktuka kan dinchhuah nan kan ram leh hnam tan vote thlak turin i penchhuak ang u,” tiin kalkhawmte a chah a ni.

Pu Lalfakzuala, Election Officer, Aizawl district chuan EVM a vote thlak dan leh VVPAT hmanga kan vote a tla nih tih finfiah dan te zirtirna a pe a, Pu VL Hruaizela Khiangte in lawmthu sawina hun a hmang bawk a ni.

He hunah hian zai thiam hrang hrangte zai ngaihthlak niin PwD leh Young voters te tan intihhlimna buatsaih a ni a, EVM/VVPAT hands-on training te neihpui vek an ni bawk.

General Election to Lok Sabha neih turah hian Accessible election neih anih theih nan Mitdel te tan EVM Balloting Unit ah vote thlakna tur candidate zawnah Braille a chhiar theih a siam a ni a, Kal theilo tan Polling Station chhunga veivahna tur wheelchair leh a tulna apiangah kailawn dah a ni bawk a ni. PwD voters, in atanga Polling station kal leh hawna mamawhte chu motor ruahman sak an ni ang a, tawngtheilote tan hriat awlsam turin Polling official te hnenah basic sign language zirtir an ni bawk a ni. Pianphunga rualbanlote chu rei tak vote thlak tura an nghah a ngaih loh nan, dar 9:00 AM atanga dar 11:00 AM chhungin polling station an thlen chuan vote thlak nghal thei tur a ruahman a ni bawk.