Vawiin khan DC Conference hall Kolasib ah Lok Sabha (MP) inthlan lo awm tur a Vohbik/ Persons with Disability (PwD) ten Vote thlak ni a kawng awlsam zawk leh ruahmanna felfai zawk hnuaia vote an thlak theihna tur ngaituahin District Monitoring Committee on Accessible Election (DCMAE) Member te an thukhawm.

DCMAE Chairman leh Kolasib DEO, Bawrhsap ni bawk Pu Zoengsanga kaihhruaih thutkhawm ah hian kum hmasa MLA inthlan a ruahmanna kalpui dan te report ngaihthlak ani a, ruahmanna fel lo lai bakah ruahmanna felfai zawk a awm theih nan sawihona neih a ni. Report a tarlan danin Kolasib District ah Vohbik 142 an awm mek a, Tuirial A/C ah 71 awm in, Kolasib A/C ah 37 leh Serlui A/C ah 34 an awm a ni.

Thutkhawm chuan Vohbik / Persons with Disability (PwD) vote nei thei rual ni tawh Vote la nei silo te zawnchhuah a March ni 28, 2019  hma ngeia electoral roll a thun turin Member ten mahni hma zawn theuhah hmalak nise tiin a rel a, Wheelchair mamawh la nei lo ten in report in Wheelchair ngaihtuah sak an ni anga, Vote thlak ni ah Vohbik te tan vote thlak a awlsam zawk nan a remchan na apiangah Election Duty motor chu hman ni se, a remchan loh na ah Auto-Rickshaw emaw Taxi emaw hman ni se, hemi buaipui tur hian MPF Kolasib District Forum chuan District election Branch chu thawhhopui rem an tih thu an tarlang bawk a ni.

DCMAE Chairman chuan Ram Rorelna Sang bera thu tur thlanchhuah na kawngah ECI thupui “No Voter To be Left behind” ina a tarlan angin India khua leh tui Vote nei thei tawhte chu Roll ah inthun lut in; Vote nei tawh te nen Rilru fim tak pu chunga Vote an thlak theihnan hmalak pui leh thawhhopui ah kalkhawm DCMAE member te chu a sawm a ni.

He hunah hian vohbik Pu R.Chhunthanga, Salem veng Kolasib hnenah wheelchair pek bawk a ni.