Govt. J. Thankima College chuan vawiin khan Inter College Quiz Competition 2013-a pakhatna an nih an lawm a, Education Minister Pu Lalsawta chu khuallian a ni.

Lawmpuina thu sawiin Pu Lalsawta chuan Mizoram zirna siamthat tumin sorkar chuan education policy a duang a, education-a tawnhriat ngah leh mithiam tak tak sawm khawmin Education Reforms Commission a din a, tihdan phung pangngai kalsanin kalphung thar tha zawk a duang a ni, a ti. Kohhran leh private school ten result tha tak tak an nei thin a. Sorkarin kum nga chhunga deficit, adhoc aided, lumpsump grant leh sorkar sikul engmah a siam belh lohna chhan pawh siam belh ai chuan a awmsa tihchangtluna, inelna thianghlim neia hmasawn tir chu a tum a ni zawk tiin private sikul pawh thawm thata, an school management board te kaihhruaina hnuaiah zirtirtute hamthatna siamsak a tum a ni, Minister chuan a ti. Zirlai thiamthei zual lawrkhawmna zirna in aiin thiamtheilo deuh leh hnufum zawk zirtira pass percentage tha tak nei thei College-te chu zirna in thaah a ngaih zawk thu sawiin chutiang chu J.Thankima College hi a ni tiin Pu Lalsawta chuan a fak a ni.

Tunhnaia neih, Mizoram Rural Bank leh Aizawl City Joint Students Union buatsaih Inter College Quiz Competition 2013-ah khan J Thankima College aiawhin JD Vanlalrema leh Lalrammawia te chuan pakhatna lawmman an dawng a ni.

Vawiin inkhawmah hian zirlai leh zirtirtute’n thawhlawm an thawhkhawm cheng 12,610 chu he college zirlai pakhat C.Lalruatfela, tunhnaia Aizawl Thuampui venga kangmei tuartu hnenah hlan a ni.

Govt. J. Thankima College hi kum 1992 a din niin tun dinhmunah hian heng subject - History, Political Science, Education, Economics, English leh Mizo ah hian degree course an nei a. Zirlai 665 awmin zirtirtu 27 an awm mek a ni. Mizoram University hnuaia 2013 result hnuhnung berah khan he college hian pass percentage nei sang ber dawttu niin kum hmasa ah phei chuan pass percentage nei sang ber dinhmun an hauh a ni.