Oil India Limited (NEF)-in Aizawl Civil Hospital hnena Ambulance a pek chu RKS Chairman leh Aizawl DC ni bawk Dr. Franklin Laltinkhuma chuan vawiin khan Civil Hospital hotute hnenah a hlan.

Ambulance inhlanna inkhawm, Dr. Lalrinliana Sailo khaihhruaiah hian Aizawl DC chuan thu sawiin, OIL-in Mizoram Health Department mamawhna thenkhat phuhruk tur a Ambulance a pe chu lawmawm a ti a. Tuialhthei leh leihnuai hausakna dang zawng thin company-te hian an thil zawn an hmuh atanga hlawkna engemawzat chu an laihchhuahna state in a chang ngei ngei tur a ni a, hei hi company leh a changtu state tan hlawkna a ni ve ve a ni. Chutih laiin mimal hlawkna um a ram zau tak tak nei ten harsatna hrang hrang an thlen thin chu thil pawi tak a ni a ti.

Vawiina Ambulance hlan tak hi changkang tak, lung enkawlna khawl ECG nen a thuam a ni.

He hun a thusawitu dang, Pu S.K. Dutta, OIL (NEF) General Manager chuan an Ambulance hlan chu an Company inkaihhruaina angin khawtlang tana tangkaina tur luanchhuahna chikhat a ni tiin, Mizoram mipuiten tangkai taka an hman a beisei thu a sawi.

OIL hian vantlang hamthat nan thil thahnem tak an thawk tawh a. Chung zingah chuan Chaltlang Community Hall sak nan a cheng nuai 2.94 a thawh te, Mizoram Student Union Inter College Football Tournament atan a cheng nuai 2 a tum sak te, Thenzawl a State Badminton Championship bultum nan cheng nuai 1-a thawh leh a dang te a tel a ni.