Education Minister Pu Lalsawta chuan vawiin khan College hrang hrang te inelna "Inter-College Quiz Competition" chu I&PR Auditorium ah a hawng. He inelna hi North Eastern Development Finance Corporation (NEDFi) chuan an din champha kum 15 na lawmna chi khat atan hmangin Govt. Aizawl West College nen a tang kawpin an buatsaih a. Quiz Competition ah hian College pariat-Pachhunga University College, Govt. Aizawl College, Govt. Zirtiri Residential College, Govt. Hrangbana College, Govt. Aizawl North College, Govt. Aizawl West College, Govt. Johnson Collelge leh Govt. T Romana College atang te in zirlai pahnih theuh an tel a ni.

Pu Lalsawta chuan Mizoramin zirna in  tha tak tak, thiam thil bik zirna chen a a nei chu a vanneihthlak takzet a ni a ti a. Polytechnic pahnih awmsa bakah pali dang sorkar laipui bultumin Kolasib, Mamit, Lawngtlai leh Saiha ah te dah belh tura ruahman mek a nih thu sawiin, National Institute of Technology (NIT) din tura hmalak mek pawh a hmun tur hmuh fel hma pawhin mimal in luah hawhin Chaltlangah bul tan thuai a ni dawn a ti.Minister chuan sorkar laipuiin mi zawng zawng tan zirna neihtir vek a tumna Right to Free and Compulsory Education hnuaiah ramchhung zirna nasa takin hma a sawn mek thu sawiin Class IV leh Class VII Board Exam pawh tihtawp a ni tawh ang,  a ti. Quiz Competition a tel te chu duhsakna hlanin he intihsiakna hian zirlaite hriatna tizau tur leh an zirlai ah thui taka a tanpui a beisei pui a ni.

Quiz Competition hi nileng a hman niin chawhnu lamah Result puan nghal a ni a. Pachhunga University College chu pakhatna niin Certificate leh cheng 15,000 an dawnga, pahnihna Zirtiri Residential Science College chuan cheng 10,000 leh certificate an dawng a, pathumna Govt.Johnson College chuan cheng 5000 leh certificate an dawng bawk a ni.