Vawiin chawhma khan District Agriculture Office Kolasib hmalakna in Circuit House Complex, Kolasib ah Rabi Mela buatsaih a ni a, Pi Sangchhin Chinzah, Deputy Commissioner chu khuallian a ni.

Pi Sangchhin Chinzah chuan Damdawi tel lo a thlai tharchhuah te chu khawvel hmun hrang hrang a mi te ngaihsan a nih mek thu sawiin Mizoram leilung hausakna hmang hian organic farming nasa zawk a kalpui uar zel a pawimawh thu a sawi. Thlasik lai a kan ram neihte dah awl mai lova, ram pawn atanga lakluh ngailo tur a heng thlasik thlai te hi kan ram ngei a kan tharchhuah ve a tul thu Pi Sangchhin Chinzah chuan a sawi bawk a ni.

Rabi Mela hawnna hun kaihruaitu Pu J Rothanga, DAO chuan Kolasib chu thlasik thlai that duhna hmun a nih thu sawiin Rabi Mela a thlai thar phochhuah te chu damdawi tel lo a enkawl vek an nih thu a sawi a. Pu Lalremruata, SDAO in technical report pekna hun hmangin Pu Joseph Lalnuntluanga, AEO chuan kalkhawmte lawmna thu a sawi bawk a ni.

Agriculture Department hnuai ah hian RKVY, NFSM leh scheme dangte kaltlangin thlasik thlai chin kawngah hmalakna kalpui thin a ni a, Rajmah, Field Pea, Vaimim, French bean leh Tel antam te chin thin a ni. Loneitu thlanchhuah te hnenah thlasik thlai chin turte pek niin tui pekna tur pipe, Water Pump set leh Water harvesting structure te a tul anga ngaihtuah sak thin an ni bawk.

Vawiin Rabi Mela Kolasiba buatsaih ah hian Kolasib district chhunga Zau hrang hrang atanga loneituten thlasik thlai an tharchhuah te chu stall 19 ah man tlawm zawk a lei theihin an rawn phochhuak a, Florist stall 4 leh Insecticides stall 2 a awm bawk a ni.