Vawiin chawhma dar 10:30Am khan DC Conference Hall-ah Siaha District Civil Supply Officer Pu C. Zadailova kaihruaina hnuaiah Siaha DCSO awpchin retailer-te chu Electronic Point of Sales (ePoS) Device hman dan zirtirna leh semna hun hman a ni.

DCSO Pu C. Zadailova chuan retailer-te'n ration sem dan thar hi an hman ngei ngei a ngaih thu leh hmang lo tura chhuanlam siam theih a nih loh thu sawiin, he khawl hi hmang thei ngang lo an awm chuan retailer an nihna thlenga bansan a ngaih mai a hlauhthawnawm thu a sawi a. Thiam ngei tum a, tih tak zeta khawl hman dan chu zir turin retailer kal khawmte chu a chah hlawm a ni. Pu C. Zadailova chuan ePoS hmanga ration sem a nih theih nan hian Food, Civil Supplies & Consumer Affairs Department chuan ruahmanna thui tak lo kalpui tawhin, mipuite ration card leh Aadhaar card thlunzawm sakin hun rei tak atangin hma an lo la tawh a. He kalphung (system) thar hi Siaha District-ah thla thar, March thla atanga hman tan tum niin, ration card leh aadhaar thlunzawm lote chuan ration buhfai an la thei tawh dawn lo va, bukna atan pawh Electronic Weighing Scale hman a ni tawh dawn a, buk dik lo awm lovin mipuite'n an chanvo dik tak an chang thei tawh dawn a ni, a ti bawk.

DCSO, Siaha hnuaiah hian Centre 21 leh FPS Retailer 114 awmin, he'ng retailer-te leh an zinga ePoS device hman harsat tura inngaite'n an aiawh a he khawl hmanga ration sem tur an ruat chhawnte he training-ah hian an tel a ni.

Vawiina retailer kal khawmte hnenah Power Point Presentation hmangin zirtirna hi Pu H. James Singh, State Manager; Pu H. Somorjit Singh, State Manager; Pu H. Mona, State Co-ordinator; Pu EVL. Hruaitluanga, State Co-ordinator te bakah Pu C. Amon, Siaha District Co-ordinator ten FPS Retailer kalkhawmte chu training an pe a, Ration sem dan thar an hman tura an mamawh tur khawlte sem nghal vek a ni bawk.