129/2024-2025 

Dated Aizawl, the 10th Tau thla, 2024: Larsap Dr. Hari Babu Kambhampati chuan nizan khan Raj Bhavan-ah Ugadi, Gudi Padwa leh Bihu kut lawmna chu khuallian niin a hmanpui.

He hunah hian Larsap chuan ‘Ugadi’ leh kut dang ho hman theih a ni chu lawmawm a tih thu sawiin, Ugadi kut chu kut pawimawh tak mai, intuaithar lehna kut anih thu a sawi a. He kut hi intuaithar lehna entirna a nihna angin state hrang hrang- Andhra Pradesh, Telangana, Karnataka leh Maharashtra-ah te chuan mahni in chei nan te, kawr thar lei nan te leh inhlan thar nan te a hun hman thin anih thu a sawi.

Larsap chuan he ni vek hian Maharashtra-ah chuan ‘Gudi Padwa’, Marathi kum thar lawmnan hun hman thin anih thu sawiin chutiang bawkin Assam-ah chuan Bohag Bihu, an kumthar bul tanna kut entirna chu tun April ni 14 hian lawmna an neih ve tur thu a sawi.

Larsap chuan heng kutpui lawmna hun hman a ni hian India ram chu ‘lo leh thlai’ kut chi hrang hrang ropui tak tak lamah a hausak zia pho lanna anih thu sawiin chung kut tam tak zinga a lar zualte chu - Baisakhi kut, Punjab, Haryana leh Himachal Pradesh-a lawm te; Mesadi kut, Karnataka-a lawm te; Panan Sankranti, Odisha a lawmte leh Vishu, Kerala leh Tamil Nadu a lawm thinte chu an nih thu a sawi bawk.

Heng kutpui hmante hi hnam hrang hrang, ram hrang hrang atanga rawn kalte intawh khawmna leh mahni hnam ziarang mawi tak tak pho lanna hmun a ni chu Larsap chuan he hun ropuina belhchhahtu anih thu sawiin state hran, hnam hran, sakhuana hran leh tawng hran theuh nei ni mah ila kan zavaiin India khua leh tui, ram inpumkhat kan nihna rawn tarlang chiangtu pawimawh tak anih thu a sawi.

Full Speech of Governor : https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-celebration-of-ugadi-at-raj-bhavan-aizawl-on-9th-april-2024

He hunah hian hnam lam mawi tak tak – Kuchipudi lam, Telugu Fusion lam, Bihu lam, Bodo lam, Assamese lam, Marathi Fusion lam, Bharatnatyam lam, Bhangra lam leh Punjabi lam te chu PUC, MZU leh RIPANS zirlaite hnen atanga entir niin heng bakah hian Medley lam, Bollywood zai, Tollywood lam leh Tlang lam te chu MZU leh Hrangbana College zirlai te hnen atang hmuh a ni bawk.

Pu Prasad Rao, GM, NABARD, Mizoram chuan Udagi chungchang thu sawina tawi neiin chutiang bawkin Dr. Kiran Kharat, Asst. Prof., MZU chuan Gudi Padwa chungchang thu sawina tawi a nei bawk a ni.

Governor, Lady Governor leh performance nei hote chuan thlalak hona neiin he hun hi khar niin, he hun hi mi pawimawh leh sawm bik hrang hrangten an chhim ve bawk a ni.