Vawiin chawhnu dar 2.00 khan UD&PA Minister Pu Zodintluanga hovin NLUP Conference Hall-ah Rajiv Awas Yojana (RAY) hnuaia State Level Sanctioning & Monitoring Committee meeting vawi 2-na neih a ni a; he meeting-ah hian UD&PA te, Aizawl Municipal Council te, LAD te leh HUDCO aiawhte an tel a ni.
RAY scheme hi Central sawrkar chuan June 2009 khan India ram puma hman turin a puang a; July, 2011 atang khan a tak taka kalpui tan a lo ni ta a ni. He scheme hian a tum ber chu khawpui chhunga miretheite chenna kawtthler leh Vengte chu kawng chi hrang hranga chawikan a, miretheite chenna hmun leh Veng bik tihbo vek ‘Slum Free India’ a ni. Hemi tihlawhtling tur hian 12th Five Year Plan hnuaiah miretheite chenna in sak sak leh a ni tin khawsak phung tihchangtlun leh tihhmasawn tum a ni a. Kum 2011-13 chhung hi he a thil tum tihlawhtling tura inbuatsaihna hun atana bituk a ni a; kum 2013-17 chhung hian RAY thiltum chu a taka hlenchhuah vek hman tura ruahman a ni.
India ram hmar-chhak bial bikah chuan a ram hmelhmang leh a chhunga cheng mipuite hnam ziarang a danglam deuh bik avangin RAY hi hmar-chhak mila her danglam hret a ni dawn a. Mizoram bikah chuan RAY hnuaia kut thlakna turin Aizawl leh Lunglei khawpuite chu thlan a ni.
Hemi chungchangah hian UD&PA Minister Pu Zodintluanga chuan, “Mizoram khawpui lan deuh deuh leh a tenau deuhvah te JNNURM hnuaiah miretheite chenna tur sak mek a ni a; Aizawl khawpui bikah chuan Rangvamual, Lawipu, Edenthar leh Durtlang-ah te JNNURM hnuaiah chak taka hna thawh mek a ni a. Tun hnu zelah chuan miretheite chenna hi hmun khatah sa lovin, mahnia in leh lo din theilote chu anmahni chenna Veng leh khua theuha an mahni ram neih saa in leh lo va dinsak hi kan kalphung thar tur atana kan duhthusam a ni” a ti.
Vawiina SLSNC meeting-ah hian RAY hnuaia project thawh khatna tur Zuangtui Veng tana Pilot Project siam chu pawm a ni a. He pilot project hnuaiah hian Zuangtui Veng-a chenna in ding sa 78 te chu a hmun ngaiah a thara sak sak a ni ang a; hei bakah hian in chhawng 4, chhawng khata chhungkaw 4 zel khawsakna tur in 4 sak a ni bawk ang. He project hnuaiah hian Zuangtui Veng chhung inkalpawhna kawngte, thlanmual tur te, community hall tur te, thiamthil zirna leh thil dehchhuah hralhna tur te, tuikhur leh van ruahtui khawlna te, bio-gas plant leh Ni zung chakna hmanga eng pekna turte pawh ruahman a ni a. He pilot project puitlinna tura sum senso tura ruahman chu cheng vaibelchhe sawmpathum leh nuai sawmhnih (Rs. 13,20,00,000.00) a ni a; chawlhkar tharah hian Central sawrkar-ah thehluh a ni ang.
