Vawiin khan Agriculture Department hotute chuan tuna MCS Officers tling thar Foundation Course neih mek te chu Dihmunzawl-a Pi Kaphliri ramah SRI method hmanga buh chindan training an neihpui a. He hunah hian Agriculture Department Director (Crop Husbandary) Dr. C. Lalzarliana pawh kalin Pu Lalthanzuala, SMS (Agri) in SRI Method hmanga buh chin dan leh a kaihhnawih hrang hrangah zirtirna pein Field Practical Training MCS Officer-te hi a hmunah entir nghal a ni.

Agriculture Director Dr. C. Lalzarliana chuan ‘Prospect of Food Security in Mizoram’ tih thupui hmangin zirtirna a pe a, Mizoram-a Agriculture dinhmun tlangpui leh District hrang hranga WRC Potential Area neih dan leh hman tangkai dan chin te Power Point hmangin a entir a, tun dinhmunah ram pumah WRC Potential Area 74,644 Ha. a zau a awm thu leh heng atang hian 12,700 Ha. buh chin nana hman tangkai a nih thu a sawi. Hei hi Potential Area kan neih zawng zawng atanga chhutin 21.37% a nih thu leh leileta siam theih ram 61,944 Ha. a awm thu a sawi bawk.

Tun dihmun atanga hmasawn lehzual theihna tur chuan phaizawl ram 50,000 Ha. a zau, leiletah siam belhin hei hian kum tin 1.50 lakh MT a lo thar chhuah belh theih ang a. Tin, ram 20,000 Ha. a zau Hill Slope Terrace-ah siamin hei pawh hian buhfai 40,000 MT kum tin tharchhuah belh tir thei bawk bakah Double Cropping-in tun aia nasa lehzuala kalpui a that thu a Dr. Lalzarliana chuan a hrilh bawk a ni.

Mizoram-a Agriculture Department hmalakna pakhat Oil Palm hi Malaysia, Indonesia, Thailand leh ram dang dang te pawhin an lo hlawkpui tawhin an ram economy dinhmun chawikangtu a ni mek a. Mizoram pawhin Sawrkar Flagship Programme kalpui mek NLUP hnuaiah Oil Palm chin hi la hlawkpui ve ngei tur beisei a ni. Tun dinhmunah Oil Palm hi Mizoram District 6 – Aizawl, Lunglei, Serchhip, Lawngtlai, Kolasib leh Mamit-ah te chingin khaw 162 atangin chhungkaw 6,025 in an ching mek a, ram 9,345 Ha. a zauah Oil Palm tiak 13,99,760 phun tawh a ni.

Oil Palm Mill/Factory pawh hmun thum – 1) Bukvannei (Kolasib District), 2) Mat Valley (Serchhip District) leh 3) Rotlang (Lunglei District) ah te bun tum niin a hmun hma tur pawh thlan fel a nih tawh a. Bukvannei-ah phei chuan August thla tawp lamah a lungphum pawh phum mai tura ruahman tawh a ni.