Vawiin khan Pu V. Lalremthanga, MCS Mamit District Bawrhsap chuan a office chamber ah Mamit khawpuia Chanchinbu mite kawmin thingpui a in pui.

Pu V. Lalremthanga, District Bawrhsap chuan Chanchinbu mite hmaah District Administration fel fai taka kalpui a nih theihna chu District chhunga department hrang hrang te thawhhona ah a innghat a ni a ti a. Official zawng zawng te hian kan mawhphurhna dik taka kan hlenchhuah hian a hlawkna teltu chu khua leh tui te an nih thu sawiin hemi kawngah hian a tha leh dik te mipuiten an hriat theihna chu thuthar thehdarhtu chanchinbu mite hi an ni a ti. Chuvangin chanchinbu mite hi mipuite kawng dika hruaitu leh sorkar thu leh hla mipuite hnena hriattirtu pawimawh tak a ni tih hriain dan leh hrai hnuaiah huaisen taka hma la thin turin a chah bawk. Thil thleng pawimawh a ziak leh lem a puang darhtute an nih avangin an hnathawhna theuh a fimkhur taka thawk turin a chah a, khawtlang hmasawnna tura rawihna an neih te leh harsatna an neih te inthlahrung lova a hnena thlen zel turin thuthar thehdarhtute chu a sawm nghal bawk a ni.

He inkawmho na ah hian Chanchinbu mite pawhin hetiang hun District Bawrhsap in a buatsaihna ah lawmthu an sawi. Thuthar thehdarhna kawngah harsatna an tawh thin, internet tha tawk loh thu te current mumal loh avanga harsatna an tawh thin thu te leh thil chi hrang hrang District Bawrhsap hnenah hian an thlen a, Bawrhsap chuan a theih ang anga hmalak pui a tum thu a hrilh bawk a ni.

District Bawrhsap hi Pu R.S. Lalzamliana, Addl. DC, Pu Benjamin Lalzama SDO (Sadar) leh Pu C. Lalnunkima, IPRO ten an tawiawm a ni. He hun ah hian chanchinbu mi an tel tha hle.