Rajiv Gandhi Stadium, Mualpuiah mi 14,565 zet thut theihna tur gallery siam tum niin vawiin khan Sports Minister Pu Zodintluanga leh Parliamentary Secretary Pu Hmingdailova Khiangte-te chuan a hmunah an tlawh.
Minister chuan RG Stadium sa chhunzawm tur hian France company tawn hriat nei tha, ALCOR Equipments nen thawhhona ziah fel a ni tawh, a ti a. Europe hmun hrang hranga Sports ruhrel lian tham siamtu company ALCOR hian French Open khelhna court gallery te, France rama World Cup thlenna Football Stadium te chu an sulhnu langsar zual zingah a tel. Pu Zodintluanga chuan tun thla July tawp atangin stadium sak belh hna hi thawh tan theih beisei a nih thu a sawi a, hemi atana pawimawh tihfel tur la awmte chu sawrkar official ten rang taka an tihfel nghal tur thu a sawi bawk.
RG Stadium gallery thar tur hi siamsa (modular) gallery niin pre-galvanized steel hmanga siam a ni dawn a. India rama ALCOR zawmpui Great Sports Infra atanga lo kal ten a sak dan tur ruahmanna an sawifiah a ni. Gallery ruangam hi France ramah siam zawh vek a ni dawn a, chu chu lawng hmanga India ramah thawn lutin Stadium hmunah an remkhawm chawp leh dawn a ni.
Gallery hi metre 200 bawr vela sei a ni dawn a, mipui thutna hnuaiah hian 300sq.m. a zau gym pakhat, 50sq.m. a zau inthlakna pindan, hmeichhia leh mipa inthiarna paruk ve ve dah a ni ang. Modular gallery hi ni 180 chhungin peihfel hman tum a ni a, France ah kar (week) 13 an siam ang a, Mizorama phurh thlenna tur leh lehkha tihfel ngai tihfel chhung nen kar 8 bawr vel awh lehin Stadium-a gallery fit tak tak hun chhung hi chu kar 5 chauh a ni dawn niin Great Sports Infra-a Director (Sales) ni lai Pu Rupesh Tikku chuan a sawi. Gallery hnungah mihring kal theihna tur metre 3 vel zuah a ni ang a, Gallery siamsa innghahna tur foundation hi hmun 1500 ah an siam dawn a ni. RG Stadium modular gallery sakna tur hian sum cheng vaibelchhe 23.5 ruahman a ni.
Tun dinhmunah Rajiv Gandhi Stadium-ah hian mi 6000 leng vel gallery a awm mek a. Gallery sak thar nen hian mi 21,000 vel an leng tawh dawn a ni. A sak hna hi July thla tawpa tan tum niin concrete structure-a sak ni ta se kum thum vel zet awh tur kha thla 6 chhunga zawh fel vek an tum a ni. Warranty hi seat bik atan kum 5 a ni ang a, gallery atan kum 10 a ni ang.
Vawiin vek khan UD&PA Minister Pu Zodintluanga hian ATC leh Hangi Lunglen tlang inkalpawhna “Construction of Ellevated Link Road, ATC Gate to Hangi Lunglen Tlang” chu a hmunah a siam theih tak tak dawn leh dawn loh a enfiah a. He hmalakna hi Mizoram sawrkar ruahman dan chuan cheng vaibelchhe 6.5 vela siam zawh tur a ni a, Zuangtui lam atanga motor kawng lo kal chuan Durlang Khama ATC ram paltlangin ATC Gate bulah kawng hi chhuak thei tura duan a nih thu Minister chuan a sawi.
ATC leh Hangi Lunglen tlang inkalpawhna hi tihpuitlin theih a nih chuan Durtlang panna kawng a chhiat palh pawhin awlsam takin kalpawh zung zung theih a ni dawn a, damlo damdawiin pan ngai leh zin veivakte tan a awlsam phah hle ang, Minister chuan a ti a. Kawng siamna tura ruahman hi kham chhengchhe tak a nih avangin khawl tha zawk hmangin zirchianna mumal leh uluk zawka kalplui a ngai dawn a ni, Pu Zodintluanga chuan a ti bawk.
Minister hi Parliamentary Secretary Pu Hmingdailova Khiangte bakah Sports Secretary Pu H.L.Rochungnunga, Planning Secretary Dr.C.Vanlalramsanga leh sawrkar official engemawzatin an tawiawm a ni.
