Election Commission of India (ECI) chuan vawiin khan state pathum atanga Member of Parliament, Rajya Sabha thlan tur chungchanga hriattirna a chhuah a, hengte hi Arunachal Pradesh atangin MP 1, Karnataka atangin MP 4 leh Mizoram atanga MP 1 te an ni.
He hriattirna ang chuan June ni 9 thleng khian hming pekluh hun hawn a ni a, June ni 10 khian hming pelut te chu endik a ni ang a, inhnukdawk duh te tan June ni 12 thleng an hming an la let thei anga, inthlan a tul tak in June ni 19 (zing dar 9 atangin tlai dar 4 tleng) khi inthlan ni atan ruat a ni a. June ni 21 ral hma in he inthlanna hi tihfel tur a ni ang.
Rajya Sabha MP te hi Legislative Assembly-a, MLA (mipui ten an thlan tlin) in an thlang thin a. Rajya Sabha ah hian MP 250 an awm a, chung zingah 238 te chu State leh UT-a MLA ten an thlang thin a, a bak member 12 chu mi chungchuang ram tana rawngbawlna leh thawh ropui neite atangin President in a nominate thin a ni. Rajya Sabha MP term hi kum 6 niin kum hnih danah MP hmun thuma thena hmunkhat an chawl(retire) thin a ni. Engtik lai pawhin Member of Parliament an awm thin vangin Rajya Sabha hi Upper House of Parliament leh Permanent House te pawh tih thin a ni.
